გაეროს გენერალური ასამბლეის მიერ აფხაზეთიდან და სამხრეთ ოსეთიდან ქართველი დევნილების შესახებ მიღებული რეზოლუციის გადახედვის აუცილებლობის საკითხს დააყენებს რუსეთის ფედერაცია კოლექტიური უსაფრთხოების შესახებ შეთანხმების ორგანიზაციის (ოდკბ) წევრი-სახელმწიფოების (სომხეთი, ბელორუსი, ყაზახეთი, ყირგიზეთი, რუსეთი, ტაჯიკეთი, უზბეკეთი) საგარეო საქმეთა მინისტრების არაფორმალურ შეხვედრაზე რომელიც დღეს ნიუ-იორკში იმართება.
განცხადება ამის შესახებ კოლექტიური უსაფრთხოების შესახებ შეთანხმების ორგანიზაციის თავმჯდომარემ ნიკოლაი ბორდიუჟამ რუსულ მედიასთან საუბარში გააკეთა.
"რუსეთი აპირებს წინ წამოსწიოს საკითხი დევნილთა შესახებ საქართველოს რეზოლუციის შესახებ. რეზოლუციაში საკმაოდ ამაზრზენად არის შეფასებული კავკასიაში მიმდინარე ამბები. ამიტომაც რუსეთი ამ დოკუმენტის კატეგორიული წინააღმდეგია", _ აცხადებს ბორდიუჟა.
მისივე განცხადებით, რუსეთის ფედერაციას არ სურს, რომ დევნილთა უფლებების შესახებ რეზოლუცია ვინმემ სერიოზულად განიხილოს.
"გვსურს, რომ ეს რეზოლუცია სერიოზულად არ განიხილებოდეს, მაგრამ თუკი მისი განხილვა აუცილებელია, მაშინ მასში უნდა შევიდეს შესაბამისი ცვლილებები, რომლებიც კავკასიაში არსებული სიტუაციის ანალიზის შედეგად იქნება წარმოდგენილი", _ აცხადებს ნიკოლაი ბორდიუჟა.
შეგახსენებთ, რომ გაეროს გენერალურმა ასამბლეამ აღიარა "ყველა იძულებით გადაადგილებული პირისა და დევნილის და მათი შთამომავლების უფლებები, ეთნიკური კუთვნილების მიუხედავად, საქართველოს მთელ ტერიტორიაზე, მათ შორის აფხაზეთში და სამხრეთ ოსეთში, საკუთარ სახლებში დაბრუნების თაობაზე".
ასამბლეაზე მიღებულ იქნა რეზოლუცია "აფხაზეთიდან, საქართველო, და ცხინვალის რეგიონიდან / სამხრეთ ოსეთი, საქართველო, იძულებით გადაადგილებულ პირთა და დევნილთა მდგომარეობის შესახებ".
რეზოლუციაში გამოხატულია შეშფოთება კონფლიქტების შედეგად საქართველოში დემოგრაფიული სიტუაციის ძალისმიერი შეცვლის შესახებ.
ასამბლეის მიერ მიღებულ რეზოლუციაში ხაზგასმულია კონფლიქტის შედეგად დაზარალებულ, იძულებით გადაადგილებულ პირთა და დევნილთა ქონებრივი უფლებების დაცვის აუცილებლობა და აღნიშნულია მათი საკუთრების შეძენაზე თავის შეკავების შესახებ.
რეზოლუციაში აღნიშნულია, რომ გენერალური ასამბლეა დემოგრაფიული ვითარების ძალისმიერად შეცვლას დაუშვებლად მიიჩნევს.
კენჭისყრის მიხედვით რეზოლუციას მხარი დაუჭირა 50 სახელმწიფომ, წინააღმდეგ მისცა ხმა 17-მა, ხოლო 86-მა სახელმწიფომ კენჭისყრაში მონაწილეობისგან თავი შეიკავა.