საქართველოს საგარეო საქმეთა სამინისტრო გრიგორი კარასინის გაზეთ "იზვესტიაში" გამოქვეყნებულ სტატიას ეხმარება და აკრიტიკებს.
"გამოქვეყნებული სტატიის პირველსავე აბზაცში ბატონი კარასინი ჩვეულებისამებრ ცდილობს თავს მოახვიოს მკითხველს ის ე.წ. "ახალი რეალობა", რომლის შექმნასა და დაკანონებასაც რუსეთი საქართველოს განუყოფელი ნაწილების ოკუპაციისა და ამ ტერიტორიებზე ჩატარებული ეთნიკური წმენდის შემდეგ ცდილობს. გ. კარასინი გაოცებასაც კი გამოთქვამს იმ ფაქტით, რომ ეს მოსკოვისთის სანუკვარი რეალობა არავინ სცნო გარდა ორი მარგინალური რეჟიმისა და ერთი ტერორისტული ორგანიზაციისა", - ნათქვამია საქართველოს საგარეო უწყების განცხადებაში.
რაც შეეხება ჟენევის მოლაპარაკებების ფორმატს, ვაშაძის სამინისტროს განმარტებით, "ის 2008 წლის რუსეთ-საქართველოს აგვისტოს ომის შემდეგ შეიქმნა, როგორც კონფლიქტის მშვიდობიანი გზით გადაწყვეტის ერთ-ერთი საშუალება".
"მოლაპარაკებებს თავმჯდომარეობენ ევროკავშირი, გაერო და ეუთო. ესწრებიან მონაწილეები საქართველოდან, რუსეთის ფედერაციიდან და აშშ-დან. ჟენევის მოლაპარაკებების ფორმატში შექმნილია ორი არაფორმალური სამუშაო ჯგუფი უსაფრთხოებასა და ჰუმანიტარულ საკითხებზე, რომელშიც მონაწილენი წარმოდგენილნი არიან ინდივიდუალურად. სამუშაო ჯგუფებში ჟენევის მოლაპარაკებების თანათავმჯდომარეებისა და მონაწილეების გარდა, ინდივიდუალურად ჩართულნი არიან აფხაზეთისა და ცხინვალის მარიონეტული რეჟიმების წარმომადგენლები და სამხრეთ ოსეთის ყოფილი ავტონომიური ოლქის დროებითი ადმინისტრაციული ხელმძღვანელი, აფხაზეთის ავტონომიური რესპუბლიკის მთავრობის თავმჯდომარე. ამდენად რუსი დიპლომატი თავისი უსაფუძვლო თეზისის დასასაბუთებლად შეგნებულად ამახინჯებს ფაქტებს", - აღნიშნულია განცხადებაში.
"რუსეთის საგარეო უწყების ხელმძღვანელის მოადგილე ასევე საუბრობს ე.წ. რუს „მესაზღვრეებზე" და ცინიკურად აღნიშნავს იმ დამსახურებას, რომელიც მიუძღვის „სიტუაციის ნორმალიზაციაში". შეგახსენებთ, რომ საუბარია ოკუპანტი ქვეყნის ფედერალური დაზვერვის სამსახურის (ФСБ) თანამშრომლებზე, რომელთა მთავარი დანიშნულებაა გაამყარონ საოკუპაციო რეჟიმი სხვა სახელმწიფოს ტერიტორიაზე. რაც შეეხება თეზისს ძალის არგამოყენების შესახებ შეთანხმებასთან დაკავშირებით, საქართველოს მხარე მზადაა განიხილოს ამგვარი დოკუმენტის შემუშავების შესაძლებლობა, მაგრამ მხოლოდ იმ შემთხვევაში თუ მის მხარეებად გამოვლენ - რუსეთი, როგორც აგრესორი ქვეყანა და საქართველო, როგორც ამ აგრესიის მსხვერპლი სახელმწიფო, რომლის ტერიტორიის 20% ამჟამად ოკუპირებულია. ჩვენ დაინტერესებული ვართ იმით, რომ რუსეთის მხარემ იკისროს ძალის არგამოყენების იურიდიული ვალდებულება. თუმცა, როდესაც საუბარია რუსეთზე, რომელიც არად დაგიდევთ არც საერთაშორისო სამართლის ნორმებსა და პრინციპებს და არც საკუთარ საერთაშორისო ვალდებულებებს, ძნელია რაიმე დადებითი შედეგის იმედი იქონიო", - ნათქვამია ვაშაძის უწყების განცხადებაში.
გარდა ამისა, საქართველო საგარეო საქმეთა სამინისტროს შეფასებით, რუსეთის საგარეო პოლიტიკური უწყების მაღალჩინოსანს არც კი ესმის, რომ როდესაც იგი ეჭვს ქვეშ აყენებს ცეცხლის შეწყვეტის შესახებ ექვსპუნქტიანი შეთანხმების ნამდვილობას, ამით იგი სათუოს ხდის საკუთარი პრეზიდენტის ხელმოწერასა და პრესტიჟს".
"ამგვარი უხეში, არაკორექტული გამოხდომები რუსეთის საგარეო უწყების ჩვეულ მანერად გადაიქცა და როგორც წესი გამოიყენება მაშინ, როდესაც არანაირი ცივილიზებული არგუმენტი არ გააჩნიათ. ვფიქრობთ საერთაშორისო თანამეგობრობა ჯეროვანი ყურადღებით მოეკიდება რუსეთის მხარის „აღმოჩენას" ცეცხლის შეწყვეტის შეთანხმებასთან დაკავშირებით და გააკეთებს შესაბამის დასკვნებს იმის თაობაზე, თუ რუსეთის სახით რამდენად პატიოსან და საიმედო პარტნიორთან აქვს საქმე", - აღნიშნულია განცხადებაში.
შეგახსენებთ, რომ 10 ნოემბერს, გაზეთ "იზვესტიაში" რუსეთის საგარეო საქმეთა მინისტრის მოადგილის გრიგორი კარასინი სსტატია გამოქვეყნდა, სათაურით "იმიერკავკასია "ჟენევის ფორმატში".
