დემოკრატიული ინსტიტუტების გაძლიერებით და არ მათზე თავდასხმით უნდა გავუმკლავდეთ ჩვენ ამ მთავარ გამოწვევას - ამის შესახებ განცხადება სახელმწიფო მინისტრმა შერიგებისა და სამოქალაქო საკითხებში ქეთევან ციხელაშვილმა შს მინისტრთან დაკავშირებით გააკეთა.
„სწორედ იმიტომ, რომ ოკუპაცია არის ძალიან რეალური და არ არის სადღაც შორს და საერთოდ, ჩვენი ყოველდღიურობის ნაწილია, მნიშვნელოვანი, რომ ჩვენ გავაცნობიეროთ, რომ მხოლოდ ძალიან თანმიმდევრული, პრინციპული პოლიტიკით, ძალიან დინამიური, სამშვიდობო ნაბიჯებით, ქვეყნის ეკონომიკის გაძლიერებით და არა დასუსტებით, დემოკრატიული ინსტიტუტების გაძლიერებით და არ მათზე თავდასხმით უნდა გავუმკლავდეთ ჩვენ ამ მთავარ გამოწვევას. მე ვფიქრობ, რომ ამას არც პარტიულობა, არც სახელები და გვარები არ უნდა განსაზღვრავდეს”,- განაცხადა ციხელაშვილმა.
მისი თქმით, დღეს ყველაზე მნიშვნელოვანი სახელმწიფო ინსტიტუტების შენარჩუნებაა.
"ზუსტად ამიტომ ჩემთვის პირადად არის აბსოლუტურად მიუღებელი, რომ ნებისმიერი მცდელობა, რომ გულწრფელი ემოცია, თუ გინდაც პროტესტი ამ მიმართულებით გამოყენებულ იქნას რაიმე ტიპის პოლიტიკური სპეკულაციების და უარესი, პირდაპირ ძალადობრივი თავდასხმებისთვის სახელმწიფო ინსტიტუტებზე. სახელმწიფო ინსტიტუტების შენარჩუნება არის ჩვენი მთავარი სახელმწიფო ინტერესი დღეს, ხოლო სახელმწიფო ინსტიტუტების ჩამოშლა არის ჩვენი არა კეთილმოსურნეების ინტერესი. ამას არ სჭირდება ბევრი ანალიზი, ძალიან დიდი ლოგიკა”,- აღნიშნა სახელმწიფო მინისტრმა.
მინისტრი ფიქრობს, რომ შს მინისტრი 20 ივნისს საქართველოს კონსტიტუციას, სახელმწიფო ინსტიტუტებს და საქართველოს უსაფრთხოებას იცავდა.
"ამ სულისკვეთებით მოქმედებდა საქართველოს ხელისუფლება და შს მინისტრი ბატონი გიორგი გახარია, როდესაც 20 ივნისს ის იცავდა საქართველოს კონსტიტუციას, სახელმწიფო ინსტიტუტებს და საქართველოს უსაფრთხოებას. გიორგი გახარია იმ მთავრობის ნაწილია, რომელსაც ეს სულისკვეთება გააჩნია და ამ სულისკვეთებით მოქმედებდა,“- განაცხადა ციხელაშვილმა.
