ქართული ოცნების ლიდერმა, ანრი ოხანაშვილმა პარლამენტის ხმაურიანი სესიის მიმდინარეობისას კომენტარი გააკეთა და განაცხადა, რომ შინაგან საქმეთა მინისტრმა სახელმწიფოს ააცილა „ნაციონალური მოძრაობის“ მხრიდან სახელმწიფო გადატრიალება. მისი თქმით, გახარიას გადადგომას ისინი ვერ ეღირსებიან.
„მათ არანაირი მორალური უფლება არ გააჩნიათ იმყოფებოდნენ საქართველოს პარლამენტში და მითუმეტეს, საქართველოს პარლამენტის პლენარულ სხდომათა დარბაზში. მე მესმის, რომ მათი ნატვრაა, რომ პარლამენტის თავჯდომარის შემდეგ გადადგეს შინაგან საქმეთა მინისტრი. რუსთავი 2 ითხოვს „ნაციონალური მოძრაობა“ და ის აქტივისტები, რომლებიც გარეთ არიან და ჩვენ ახალგაზრდებზე ვზრუნავთ.
გახარიამ სახელმწიფოს ააცილა „ნაციონალური მოძრაობის“ მხრიდან სახელმწიფო გადატრიალება. ვერ ეღირსება „ნაციონალური მოძრაობა“, რომ შინაგან საქმეთა მინისტრად არ იყოს გახარია. გიორგი გახარიამ უზრუნველყო საზოგადოებრივი უსაფრთხოება. ძალიან ცუდია, ძალიან მძიმე ფაქტები მოხდა. ჩვენი საზოგადოების ჯანმრთელობა არის ჩვენთვის უმთავრესი. მე ვარ ყველა იმ მშვიდობიან ახალგაზრდასთან, რომლებიც მიტინგზე მოდიოდნენ, თავის გულწრფელ პროტესტს აფიქსირებდნენ. საზოგადოებას აინტერესებს ყველა კრიტიკულ შეკითხვაზე პასუხი - აბსოლუტურად ყველა შეკითხვაზე მზად ვართ გავცეთ პასუხი. მესმის, რომ „ნაციონალურ მოძრაობას“ უნდოდა, რომ აქ ჩვენ არ ვმდგარიყავით დღეს, ჩვენი საზოგადოების ინტერესები არ ყოფილიყო წარმოდგენილი. რა თქმა უნდა იყო მძიმე, ის რაც მოხდა პარლამენტის შენობაში. ყველა იმ ახალგაზრდასთან, რომლებიც მშვიდობიანად და აბსოლუტურად გულწრფელად აპროტესტებენ იმას, რაც მოხდა პარლამენტში, ვართ სოლიდარული და მხარს ვუჭერთ მათ ამ მშვიდობიან პროტესტში. ეს გავიგეთ და ამაში ჩვენ ვართ სოლიდარული. ამაზე პარლამენტის თავმჯდომარემ აიღო ძალიან დიდი პოლიტიკური პასუხისმგებლობა, დატოვა კონკრეტულმა ორგანიზატორმა პარლამენტის წევრის მანდატი. ძალიან მძიმე სანახავი იყო და ჩვენ არცერთი პოზიცია, არცერთი თანამდებობა არ გვიღირს ჩვენი საზოგადოების ინტერესის ხარჯზე, რომ ვინმემ რაიმე პოზიცია შეასრულოს და ამით ჩვენი საზოგადოების ინტერესები დაზარალდეს. ჩვენი ამოცანაა ჩვენს საზოგადოებაზე ზრუნვა. ჩვენ ამას ვაკეთებთ და მე იმედი მაქვს, რომ ჩვენ ყველაფერს გავაკეთებთ და მალე გამოჯანმრთელდებიან ის დაშავებული ადამიანები.“- განაცხადა ანრი ოხანაშვილმა.
