საქართველოს ხელისუფლება სააკაშვილს ეჯიბრება, ვინ უფრო მეტად პროდასავლურია, - ამის შესახებ "ერთიანი საქართველოს" ლიდერმა ნინო ბურჯანაძემ რუსულ გამოცემა "იზვესტიასთან" ინტერვიუში განაცხადა.
"სამწუხაროდ, ჩვენი ხელისუფლების არაშორსმჭვრეტელობის გამო სწრაფად დაბრუნდეს რუსეთ-საქართველოს ურთიერთობა არა დამაკმაყოფილებელ, არამედ იმ დონეზე მაინც, რომელიც ერთი კვირის წინ იყო, ძალიან რთული იქნება", - აღნიშნა ბურჯანაძემ.
მისი თქმით, საქართველოში მიმიდნარე მოვლენებში რუსეთი და სერგეი გავრილოვი არაფერ შუაშია და დემონსტრანტების გულწრფლი პროტესტი აქტიურად გამოიყენეს პროდასავლურმა პოლიტიკურმა ძალებმა და ყველაფერი გააკეთეს იმისთვის, რომ ეს პროტესტი ანტირუსულ ისტერიაში გადაზრდილიყო.
"განსაკუთრებით შეეცადნენ სააკაშვილის მხარდამჭერი პარტიები. ყველაფერი წინასწარ იყო განზრახული, რათა პროტესტი ანტირუსულ ისტერიაში გადაზრდილიყო. სამწუხაროდ, ის, რაც დღეს საქართველოში ხდება - ეს ანტირუსული ისტერიაა. მრჩება შთაბეჭდილება, რომ გარეთ არა 2019, არამედ 2008 წელია და თითქოს ხალხმა ახლა გაიგო, რაც მოხდა აფხაზეთსა და სამხრეთ ოსეთში. ეს რა თქმა უნდა, უფრო მწვავდება ამერიკული სპეცსამსახურების მიერ", - აცხადებს ბურჯანაძე და აღნიშნავს, რომ ბიძინა ივანიშვილს სხვა არჩევანი არ აქვს გარდა იმისა, რომ დათანხმდეს ოპოზიციის მოთხოვნებს პროპორციული არჩევნების ჩატარებასთან დაკავშირებით.
ბურჯანაძის განცხადებით, ივანიშვილს შველის ის, რომ მოსახლეობის უმეტესობას სააკაშვილის დაბრუნება არ სურს, თუმცა შექმნილია სიტუაცია, რომ არც ივანიშვილი არ უნდათ.
"ივანიშვილს შველის ის, რომ საქართველოში ბევრს სააკაშვილის დაბრუნება არ სურს. შეიქმნა ისეთი სიტუაცია, რომ ადამიანებს არც ივანიშვილი და არც სააკაშვილი სურთ. თუმცა პრობლემა ის არის, რომ სააკაშვილი თამაშობს არამხოლოდ თავის თამაშს, არამედ მოქმედებს ამერიკული სპეცსამსახურების ინტერესებშიც",- აღნიშნა ბურჯანაძემ.
ბურჯანაძე ამბობს, რომ არ შეუძლია იმის თქმა, შეძლებს თუ არა საქართველოს ხელისუფლება რუსეთთან ურთიერთობის დალაგებას, რადაგნ პროდასავლურობაში სააკაშვილს ეჯიბრება.
"ხელისუფლება სააკაშვილს ეჯიბრება, ვინ უფრო მეტად პროდასავლურია. გადახედეთ საქართველოს პრეზიდენტის, პრემიერისა და „ქართული ოცნების" პირველი პირების განცხადებებს. ბუნებრივია, მათ ეშინიათ თავიანთი ამერიკელი პატრონების განაწყენების. უფრო მეტიც, ივანიშვილს სიკვდილამდე ეშინია, რომ მისი მილიარდები გაიყინება", - აცხადებს ბურჯანაძე.
რუსეთის მიერ საქართველოსთან ავიამიმოსვლის შეჩერების შესახებ დასმულ შეკითხვაზე ბურჯანაძემ უპასუხა, რომ ეს საქართევლოსთვის ყველა მიმართულებით მძიმე იქნება. „რა თქმა უნდა, საქართველო ბევრს დაკარგავს. არა მხოლოდ ემოციურ და ადამიანური თვალსაზრისით, არამედ ეკონომიკური კუთხითაც. მესმის რუსეთის ხელისუფლების რეაქცია იმაზე, რაც აქ ხდება, იმ ისტერიაზე, რომელსაც სამწუხაროდ ვხედავთ, მაგრამ მინდა იმედი მქონდეს, რომ რუსეთის ხელისუფლება ამ ზომებზე შეჩერდება და მეტ შეზღუდვებს არ დააწესებს", - განაცხადა ბურჯანაძემ.
