ევროკავშირის ელჩი საქართველოში კარელ ჰარცელი ეხმიანება "ქართული ოცნების" გადაწყვეტილებას 2020 წელს საპარლამენტო არჩევნების პროპორციულ სისტემაზე გადასვლასთან დაკავშირებით. ელჩის განცხადებას საქართველოში ევროკავშირის წარმომადგენლობა ავრცელებს.
"ბოლო დროინდელმა მოვლენებმა ნათლად აჩვენა, რომ ქართულ საზოგადოებაში არსებული პრობლემების გადასაჭრელად საჭიროა დიალოგი, კონსულტაციები და კომპრომისული გადაწყვეტილებები.
აღნიშნულ კონტექსტში, ჩვენ მივესალმებით, პარტია „ქართული ოცნების“ მიერ წარმოდგენილ საკონსტიტუციო ცვლილებების პროექტს, რაც ითვალისწინებს 2020 წლის საპარლამენტო არჩევნებისთვის პროპორციულ სისტემაზე გადასვლას.
აღნიშნული ინიციატივა შესაძლებლობას აძლევს ყველა დაინტერესებულ მხარეს, გაერთიანდნენ და იმუშაონ საპარლამენტო დემოკრატიისა და პლურალიზმის გასაძლიერებლად საქართველოში.
ჩვენ ველით ფართო კონსულტაციებს და მოვუწოდებთ ყველა მხარეს კეთილსინდისიერად ჩაერთონ ამ პროცესში.
საპარლამენტო არჩევნების გათვალისწინებით, გვსურს ყურადღება გავამახვილოთ OSCE/ODHIR-ის რეკომენდაციებზე, რომლის დროული შესრულება მეტად მნიშვნელოვანია.
ჩვენ ასევე მივესალმებით მზადყოფნას, შესაბამისმა ორგანოებმა გამოიძიონ 20 ივნისს განვითარებული მოვლენები, როგორც ამას ევროსაბჭოს ადამიანის უფლებათა კომისარი და სხვები ითხოვდნენ. გვაქვს მოლოდინი, რომ პროცესი იქნება სწრაფი, გამჭვირვალე და მასში მონაწილეობას მიიღებს სახალხო დამცველი.
კიდევ ერთხელ ვაცხადებთ, რომ დემონსტრაციები უნდა გაგრძელდეს მშვიდობიანად და ყველას მოვუწოდებთ იმოქმედონ კონსტიტუციის ფარგლებში.
როგორც საქართველოს მეგობრები და პარტნიორები, მოვუწოდებთ ყველა მხარეს, იმოქმედონ ქვეყნის საუკეთესო ინტერესების გათვალისწინებით", - აღნიშნულია განცხადებაში.
24 ივნისს "ქართული ოცნების" თავმჯდომარე ბიძინა ივანიშვილმა საზოგადოებას 2020 წლის არჩევნებისპროპორციული წესით ბარიერის გარეშე ჩატარების ინიციატივა გააცნო.
