ჩვენი ხელისუფლება მოუსმენს საქართველოს ყველა მოქალაქეს, რომელიც გულწრფელად გამოხატავს პროტესტს, აცხადებს ფრაქცია „ქართული ოცნების“ თავმჯდომარე მამუკა მდინარაძე.
აქციის მონაწილეთა მოთხოვნების შესრულების, კერძოდ პროპორციულ სისტემაზე გადასვლის შესახებ დასმულ კითხვაზე მამუკა მდინარაძემ აღნიშნა, რომ დესტრუქციული ძალები გულწრფელი პროტესტის გამოყენებას ცდილობენ, თუმცა ხელისუფლება გულწრფელი პროტესტის მქონე მოქალაქეებს მოუსმენს.
„აქციაზე დგანან და იდგნენ შეიძლება, 99 პროცენტიც გულწრფელი ადამიანებისა. ხალხი იმ სურათს აპროტესტებდა, რომელიც ჩვენვე გავაპროტესტეთ. პირველები ჩვენ ვიყავით, რომლებიც აღგვაშფოთა ფაქტმა, რომელიც პარლამენტში ვიხილეთ, იმ სიმბოლურმა ცუდმა ფაქტმა. ამაზე რეაგირებაც მოვაყოლეთ. იმავე დღეს საქართველოში აღარ იყვნენ რუსი დეპუტატები. მეორე მხარეა პოლიტიკური მოთხოვნები და მეორე მხარეა ის, რომ ამ გულწრფელი პროტესტის დროს დესტრუქციული ძალები ცდილობენ, გამოიყენონ სათავისოდ პროტესტი, მოასხდნენ ამ ნარატივს და საკუთარი პოლიტიკური ინტერესები გაატარონ. ეს არის რეალობა. ამ რეალობის მიუხედავად, ჩვენი ხელისუფლება მოუსმენს საქართველოს ყველა მოქალაქეს, რომელიც გულწრფელად გამოხატავს პროტესტს“, – განაცხადა მამუკა მდინარაძემ.
