კიევის პეჩერის რაიონულმა სასამართლომ საქართველოს მესამე პრეზიდენტის, ოდესის ოლქის ყოფილი გუბერნატორის მიხეილ სააკაშვილის უკრაინაში ბოლო 5 წლის განმავლობაში უწყვეტად ცხოვრების ფაქტი აღიარა, რაც სააკაშვილს ვადამდელ საპარლამენტო არჩევნებში მონაწილეობის უფლებას აძლევს. ამის შესახებ სააკაშვილი Facebook-ის საკუთარ გვერდზე წერს.
„სასამართლომ სამართლიანი გადაწყვეტილება მიიღო და არჩევნებში მონაწილეობის უფლება მომცა. გამარჯვებას კიდევ ერთი ნაბიჯით მივუახლოვდით“, - წერს სააკაშვილი და სასამართლო დარბაზში გადაღებულ ვიდეოს ავრცელებს.
მისივე განცხადებით, უკრაინაში მოსამართლეები ზეწოლას აღარ განიცდიან.
„13 წელზე მეტი ვცხოვრობდი და ვსწავლობდი უკრაინაში, ავიღე დიპლომი, 2 წელი ვიმსახურე უკრაინაში, ვმონაწილეობდი რევოლუციებში და ხელისუფლებაშიც ვიყავი. ახლა საკუთარ გუნდთან ერთად მსურს, ზელენსკის კორუფციის დამარცხებაში დავეხმარო“, - აღნიშნა სააკაშვილმა.
