შინაგან საქმეთა მინისტრის მოადგილემ, ნათია მეზვრიშვილმა, „ტელეკომპანია პირველის“ გადაცემა „რეაქციაში“ მიიღო მონაწილეობა. ნათია მეზვრიშვილმა ხორავას ქუჩის საქმის გამოძიების მიმდინარეობასა და მის შედეგებზე ისაუბრა.
„ძალიან სამწუხაროა და ეს საქმე ნათელი დადასტურებაა იმის, თუ როგორ არ უნდა მოხდეს პოლიტიკური მიზნებისთვის ასეთი ტრაგედიების გამოყენება. ჩემთვის წარმოუდგენელია ამ საქმეზე რატომ საუბრობს მაგალითად, შალვა შავგულიძე, რომელიც კომისიის წევრიც კი არ ყოფილა და ამ საქმესთან დაკავშირებით ნაკლებად სავარაუდოა დეტალებზე ინფორმაცია ქონდეს. ჩემთვის აბსოლუტურად გასაგებია არჩევნების წინა დღეებში, ბატონი შავგულიძე რატომ საუბრობს, მე უბრალოდ ხაზს ვუსვამ, რომ ასეთ ტრაგედიების პოლიტიკური მიზნებისთვის გამოყენება, პირველ რიგში დააზარალებს იმ ადამიანების ინტერესებს, რომლებიც ასეთ საქმეებში დაზარალებულები არიან. რა თქმა უნდა, ჩვენ არ გავურბივართ პასუხისმგებლობას, რომელზეც დეტალურად შემიძლია ვისაუბრო, მაგრამ ის ადამიანებიც არ უნდა გაურბოდნენ პასუხისმგებლობას, ვინც გამოძიებასთან თანამშრომლობის უარის გამო, გამოძიებისთვის გზა-კვალის არევის გამო, ეს პროცედურები აქამდე მიიყვანა“, - განაცხადა ნათია მეზვრიშვილმა.
