თბილისის საკრებულოს თავმჯდომარე გიორგი ტყემალაძე საკრებულოს უმრავლესობის წევრების ვახტანგ შაქარიშვილის და ჯაბა ჯიშკარიანის მიერ მმართველი პარტიის დატოვებას გამოეხმაურა. მისი განცხადებით, ეს გადაწყვეტილება უმრავლესობისთვის მოულოდნელი არ ყოფილა.
„მათი გადაწყვეტილება ჩვენთვის მოულოდნელი არ ყოფილა, ამის შესახებ ინფორმირებული ვიყავით. როგორც მოგეხსენებათ, ისინი თავიანთ მომავალს სხვა ორგანიზაციას უკავშირებენ, თუმცა საკრებულოში რჩებიან და საქმიანობას გააგრძელებენ, როგორც დამოუკიდებელი დეპუტატები,“- განაცხადა თბილისის საკრებულოს თავმჯდომარემ.
შეგახსენებთ, რომ თბილისის საკრებულოს უმრავლესობის წევრებმა, ფრაქცია „ქართული ოცნება-თავისუფალი საქართველოს“ თავმჯდომარის მოადგილემ, საბურთალოს მაჟორიტარმა ვახტანგ შაქარიშვილმა და მთაწმინდის მაჟორიტარმა ჯაბა ჯიშკარიანმა დღეს საკრებულოში ბრიფინგი გამართეს, რომელზეც პარტიის „ქართული ოცნება“ დატოვების შესახებ გააკეთეს განცხადება.
