საქართველოს განათლებისა და მეცნიერების სამინისტრომ 7 პატიმრიდან, რომლებმაც ერთიანი ეროვნული გამოცდები წარმატებით ჩააბარეს შეწყალების კომისიას შუამდგომლობით მხოლოდ 3-ზე - ლევან დუმბაძეზე, მერაბ მინდელსა და რატი დარბაიძეზე მიმართა.
დუმბაძე ლევანი, დარბაიძე რატი, ზერეკიძე გიორგი, ხაბურზანია ივანე, მინდელი მერაბი, რეხვიაშვილი ლაშა და გოცაძე ბექა _ ეს იმ 7 პატიმრის ჩამონათვალია, რომლებიც ერთიანი ეროვნული გამოცდები ჩააბარეს.
განათლების მინისტრმა დიმიტრი შაშკინმა შეწყალების კომისიის წინაშე გიორგი ზერეკიძის, ივანე ხაბურძანიას, ლაშა რეხვიაშვილისა და ბექა გოცაძის შესახებ შუამდგომლობა არ დააყენა.
განათლებისა და მეცნიერების სამინისტროს ინფორმაციით, მინისტრმა კომისიას შუამდგომლობით მხოლოდ არასრულწლოვან პატიმრებზე მიმართა.
"თავისუფლების ინსტიტუტის" წევრის, თეა თუთბერიძის ინფორმაციით კი, შვიდივე პატიმარი, რომლებმაც ეროვნული გამოცდები წარმატებით ჩააბარეს, არასრულწლოვათა სასჯელაღსრულების დაწესებულებაში იხდიდნენ სასჯელს, შესაბამისად შვიდივე არასრულწლოვანი იყო.
"აბა რატომ იხდიდნენ არასრულწლოვანთა დაწესებულებაში სასჯელს?", - კითხულობს თეა თუთბერიძე და დასძენს, რომ მიზეზი, რის გამოც შაშკინის გადაწყვეტილებით, მხოლოდ 3 პატიმრის შეწყალების საკითხი განიხილება - გიორგი ზერეკიძეა, რომელის საქმეც 4 წლის წინ გახმაურდა.
"მე პირადად სხვა მოტივს ვერ ვხედავ. მათ არ უნდათ ზერეკიძის ციხიდან გაშვება და სავარაუდოდ სწორედ ამის გამო არ მიმართა მინისტრმა კომისიას შვიდივეს შუამდგომლობით. რეალურად კი ზერეკიძის გათავისუფლებით, რომელმაც უმაღლეს სასწავლებელში ჩააბარა არაფერი დაშავდება, რადგან მას ორი წელი დარჩა და შანსი აქვს უმაღლესში ისწავლოს", - აღნიშნა თუთბერიძემ "ჯი-ეიჩ-ენთან" საუბარში.
არსებული ინფორმაციით, გიორგი ზერეკიძეს 18 წელი ჯერ არ შესრულებია.
შეგახსენებთ, რომ გიორგი ზერეკიძე 4 წლის წინ, სხეულის განზრახ დაზიანების ბრალდებით დააკავეს. მისი გათავისუფლების მოთხოვნით თავის დროზე საპროტესტო აქციებიც იმართებოდა.
ცნობისათვის, საქართველოს განათლებისა და მეცნიერების მინისტრის პირველმა მოადგილემ კოკა სეფერთელაძემ დღეს გამართულ ბრიფინგზე აღნიშნა, რომ სამმა არასრულწლოვანმა (ლევან დუმბაძე, მერაბ მინდელი, რატი დარბაიძე) ჩააბარა ერთიანი ეროვნული გამოცდები და გახდა სტუდენტი.
"სამინისტრო აცნობიერებს განათლების განსაკუთრებულ მნიშვნელობას არასრულწლოვან მსჯავრდებულთა რეაბილიტაციისა და შემდგომი რეინტეგრაციის პროცესში და მიიჩნევს, რომ ამ მსჯავრდებულების გათავისუფლებით და უმაღლესი განათლების მიღების ხელშეწყობით, მათი ცხოვრება სასიკეთოდ შეიცვლება და ისინი საზოგადოებას დაუბრუნდებიან სრულყოფილ წევრებად", - განაცხადა სეფერთელაძემ.
