მამუკა ხაზარაძემ ღიად განაცხადა, რომ 2018 წლის ივნისიდან მოყოლებული, არის სახელმწიფო უწყებებისგან ორკესტრირებული შეტევის ობიექტი, განმარტავს ევროპული საქართველოს ერთ-ერთი ლიდერი ოთარ კახიძე.
კახიძე განმარტავს, რომ აღნიშნული შეტევის ინსტრუმენტებად გამოყენებულია ერთმანეთისგან დამოუკიდებელი ინსტიტუტები: ეროვნული ბანკი, პროკურატურა, მთავრობის ფინანსური მონიტორინგის სამსახური, ფინანსთა სამინისტრო, სამთავრობო სოციალური მედია და ა.შ.
"მან ასევე ახსენა ჰაკერული შეტევა ბანკზე, რომლის ორგანიზატორები, ოფისის მისამართი და კომპიუტერიც კი დადგენილია, მაგრამ გამოძიება თვეების მანძილზე უშედეგოდ მიმდინარეობს.
ხაზარაძემ პირდაპირ დაადანაშაულა შინაგან საქმეთა მინისტრი - გიორგი გახარია მის მიმართ ზეწოლასა და მუქარაში.
მან ასევე პირდაპირ დაადანაშაულა ეროვნული ბანკის პრეზიდენტი და მისი მოადგილე შანტაჟში.
საქართველოს კონსტიტუციის 42-ე მუხლისა და პარლამენტის რეგლამენტის 61-ე მუხლის შესაბამისად, სახელმწიფო ორგანოებისა და თანამდებობის პირების მიერ საქართველოს კანონმდებლობის დარღვევის ფაქტების გამოკვლევისა და შესაბამისი რეაგირების მიზნით, "ევროპული საქართველო" მოითხოვს, დაუყოვნებლივ შეიქმნას საპარლამენტო საგამოძიებო კომისია", აცხადებს კახიძე.