„ნაციონალური მოძრაობა“ იუსტიციის სამინისტროს საქართველოს პარლამენტის რეგლამენტის დარღვევაში დებს ბრალს.
„ფრაქცია „ნაციონალურმა მოძრაობამ“ საქართველოს პარლამენტის რეგლამენტით მონიჭებული უფლებამოსილების ფარგლებში მიმართა საქართველოს იუსტიციის სამინისტროს სისტემაში შემავალ სპეციალურ პენიტენციურ სამსახურს, მსჯავრდებულთათვის ინფორმაციის მიღების შეზღუდვასთან დაკავშირებით. კერძოდ, მოვითხოვეთ განმარტება, თუ რატომ ეზღუდებათ პატიმრებს ინფორმაციის მიღების თავისუფლება და რატომ არის გათიშული ტელეკომპანია რუსთავი 2-ის მაუწყებლობა სპეციალური პენიტენციური სამსახურის დაწესებულებებში. ასევე, წერილით მოთხოვნილ იყო ინფორმაცია, თუ რომელ პენიტენციურ დაწესებულებებში არ მაუწყებლობს ტელეკომპანია რუსთავი 2”, აღნიშნულია მარტიის მიერ გავრცელებულ განცხადებაში.
აღსანიშნავია, რომ წერილი გაგზავნილ იქნა 2019 წლის 25 იანვარს თუმცა დღემდე შესაბამისი წერილობითი პასუხის ჩვენ მიერ დასმულ კითხვებზე არ მიგვიღია.
„საგულისხმოა, რომ საქართველოს პარალმენტის რეგლამენტის 148-ე მუხლი მე-4 პუნქტის მიხედვით „თითოეული ორგანო, თანამდებობის პირი, რომელსაც კითხვით მიმართეს, ვალდებულია პარლამენტს კითხვის მიღებიდან 15 დღეში წარუდგინოს სრული წერილობითი პასუხი. შესაბამის პირს კითხვაზე პასუხის გაცემის ვადა კითხვის ავტორთან შეთანხმებით შეიძლება გაუგრძელდეს 10 დღით.”
დღეს არსებული მდგომარეობით საქართველოს იუსტიციის სამინისტროს სისტემაში შემავალმა სპეციალურ პენიტენციურ სამსახურმა გადააცილა რეგლამენტით განსაზღვრულ დადგენილ ვადას, რაც პირდაპირ წარმოადგენს რეგლამენტის დარღვევას და პარლამენტის უპატივცემულობას.
აღსანიშნავია, რომ საქართველოს პარალმენტის რეგლამენტის 226-ე მუხლის მიხედვით გათვალისწინებულია სხვა თანამდებობის პირის მიერ რეგლამენტის დარღვევის შემთხვევაში სანქციები. თანამდებობის პირის პასუხისმგებლობის საკითხი დგება იმ შემთხვევაში, თუ თანამდებობის პირი არღვევს პარლამენტის წევრის კითხვაზე/შეკითხვაზე პასუხის გაცემისათვის დაწესებულ პროცედურას; ხოლო პარლამენტი ამ შემთხვევაში პარლამენტი თანამდებობის პირის (გარდა საქართველოს მთავრობის წევრისა) მიმართ იყენებს რეაგირების შემდეგ ფორმებს:
ა) იღებს დადგენილებას ან რეზოლუციას დარღვევის გამო კონკრეტული თანამდებობის პირის მიმართ რეაგირების ზომების მისაღებად;
ბ) სახელმწიფო უწყების ხელმძღვანელს მიმართავს რეკომენდაციით მისდამი დაქვემდებარებული თანამდებობის პირის პასუხისმგებლობის შესახებ.
ფრაქცია „ნაციონალური მოძრაობა“ გამოიყენებს საქართველოს პარლამენტის რეგლამენტით გათვალისწინებულ ყველა საშუალებას, რათა დაცული იქნას კანონის მოთხოვნები”, განმარტავენ ენმ-ში.
