ვენესუელის ოპოზიციის ლიდერმა და ქვეყნის დროებითმა პრეზიდენტმა ხუან გუაიდომ პირობა დადო, რომ კარაკასში არალეგიტიმური პრეზიდენტის, ნიკოლა მადროუს მიერ ჰუმანიტარული დახმარების ბლოკადას მოხსნის და ვენესუელის მოქალაქეებს დახმარებით უზრუნველყოფს.
"ჩვენ გვყავს თითქმის 300 000 თანამოქალაქე, რომლებიც დახმარების გარეშე დაიხოცებიან, თითქმის ორი მილიონი ადამიანია ჯანმრთელობის რისკის ქვეშ", - განაცხადა გუაიდომ კარაკასში სამშაბათს გამართულ აქციაზე.
ხუან გუაიდომ, რომელიც აშშ-მა და 20-ზე მეტმა ქვეყანამ, მათ შორის საქართველომ, ვენესუელის დროებით პრეზიდენტად აღიარა, მის მხარდამჭერებს დედაქალაქში შეჰპირდა, რომ ვენესუელაში ჰუმანიტარული დახმარება 23 თებერვალს შევა.
არალეგიტიმური პრეზიდენტი მადურო კვლავ სარგებლობს ვენესუელის მოსახლეობის ფართო მხარდაჭერითა და სამხედრო ერთგულებით, ხოლო მის მემარცხენე მთავრობას მხარს უჭერს რუსეთი და ჩინეთი, მაგრამ ის მზარდი ეროვნული და საერთაშორისო ზეწოლის ქვეშ იმყოფება. აშშ და ქვეყნები, რომლებმაც ხუან გაუიდოს მხარდაჭერა გამოუცხადეს, არალეგიტიმურ პრეზიდენტს ვადამდელ საპრეზიდენტო არჩევნების დანიშვნისკენ მოუწოდებენ.
შეგახსენებთ, რომ გაეროს ინფორმაციით, სულ მცირე 40 ადამიანი დაიღუპა და 850-მდე პირი დაპატიმრებულია ვენესუელაში საპროტესტო აქციების მიმდინარეობისას.
23 იანვარს კარაკასში ვენესუელის ამჟამინდელი პრეზიდენტის ნიკოლას მადუროს წინააღმდეგ მასშტაბური საპროტესტო აქციები დაიწყო. იმავე დღეს, ვენესუელის ეროვნული ასამბლეის პრეზიდენტმა, ოპოზიციის ლიდერმა ხუან გუაიდომ თავი ქვეყნის დროებით პრეზიდენტად გამოაცხადა.
შეერთებულმა შტატებმა, კანადამ, ბრაზილიამ, არგენტინამ, საქართველომ და სხვა ქვეყნებმა აღიარეს ხუან გუაიდო ვენესუელის დროებით პრეზიდენტად და მოუწოდეს ნიკოლას მადუროს, ხელი არ აღემართა ვენესუელაში მიმდინარე საპროტესტო აქციების მონაწილეების წინააღმდეგ. თავის მხრივ ნიკოლას მადურომ უზენაეს სასამართლოში სიტყვით გამოსვლისას კიდევ ერთხელ გამოაცხადა თავისი ლეგიტიმურობა და გუაიდოს "აშშ-ის მარიონეტი" უწოდა.
ხუან გუაიდოს მხარდაჭერას უცხადებენ ასევე ევროკავშირში. ამასთან საფრანგეთმა ხუან გაიდოს დროებით პრეზიდენტად აღიარების პირობა დაასახელა.
ნიკოლას მადუროს პრეზიდენტობის ლეგიტიმურობას აღიარებენ რუსეთი, ბოლივია, თურქეთი, სირია, მექსიკა, კუბა და ბელარუსი.