"დონალდ ტრამპ, ხელები შორს ვენესუელისგან, არ ჩაერიო, ხელები შორს! დონალდ ტრამპ, ხელები შორს ვენესუელისგან, დაუყოვნებლივ! - ასე მიმართა დონალდ ტრამპს ვენესუელის ამჟამინდელმა პრეზიდენტმა ნიკოლას მადურომ ინგლისურ ენაზე.
მადურომ აღნიშნული განცხადება პრეზიდენტის რეზიდენციაში საზოგადოებასთან გამართულ შეხვედრაზე გააკეთა. მადუროს სიტყვებს დარბაზში ოვაციები მოჰყვა.
აღნიშნულ შეხვედრაზე მადურომ ისაუბრა აშშ-ის მიერ ვენესუელის სახელმწიფო ნავთობკომპანიის აქტივების გაყინვის შესახებ და განაცხადა, რომ მისი ანგარიშების დაბლოკვა მიუღებელი და არაკანონიერია.
შეგახსენებთ, რომ გაეროს ინფორმაციით, სულ მცირე 40 ადამიანი დაიღუპა და 850-მდე პირი დაპატიმრებულია ვენესუელაში საპროტესტო აქციების მიმდინარეობისას.
23 იანვარს კარაკასში ვენესუელის ამჟამინდელი პრეზიდენტის ნიკოლას მადუროს წინააღმდეგ მასშტაბური საპროტესტო აქციები დაიწყო. იმავე დღეს, ვენესუელის ეროვნული ასამბლეის პრეზიდენტმა, ოპოზიციის ლიდერმა ხუან გუაიდომ თავი ქვეყნის დროებით პრეზიდენტად გამოაცხადა.
შეერთებულმა შტატებმა, კანადამ, ბრაზილიამ, არგენტინამ, საქართველომ და სხვა ქვეყნებმა აღიარეს ხუან გუაიდო ვენესუელის დროებით პრეზიდენტად და მოუწოდეს ნიკოლას მადუროს, ხელი არ აღემართა ვენესუელაში მიმდინარე საპროტესტო აქციების მონაწილეების წინააღმდეგ. თავის მხრივ ნიკოლას მადურომ უზენაეს სასამართლოში სიტყვით გამოსვლისას კიდევ ერთხელ გამოაცხადა თავისი ლეგიტიმურობა და გუაიდოს "აშშ-ის მარიონეტი" უწოდა.
ხუან გუაიდოს მხარდაჭერას უცხადებენ ასევე ევროკავშირში. ამასთან საფრანგეთმა ხუან გაიდოს დროებით პრეზიდენტად აღიარების პირობა დაასახელა.
ნიკოლას მადუროს პრეზიდენტობის ლეგიტიმურობას აღიარებენ რუსეთი, თურქეთი, სირია, მექსიკა, კუბა და ბელარუსი.
