ვაშინგტონმა ვენესუელის დროებით პრეზიდენტს, ხუან გუაიდოს აშშ-ის ბანკებში განთავსებული ვენესუელის აქტივების გაკონტროლებისა და ხელმისაწვდომობის უფლება მისცა. აღნიშნულის შესახებ ინფორმაცია ამერიკის სახელმწიფო დეპარტამენტის ოფიციალურ ვებგვერდზე გამოქვეყნდა.
ვენესუელის აქტივები დაცულია აშშ-ის ფედერალურ სარეზერვო ბანკში ნიუ-იორკსა და სხვა რამდენიმე ბანკში.
ფედერალური რეზერვების შესახებ ამერიკული კანონმდებლობა ითვალისწინებს, რომ უცხო ქვეყნის სახსრების განკარგვაზე უფლებამოსილება გადასცეს იმ ხელისუფლების წარმომადგენელს ვისაც აშშ-ი აღიარებს.
შეგახსენებთ, რომ ოთხშაბათს, 23 იანვარს კარაკასში ვენესუელის ამჟამინდელი პრეზიდენტის ნიკოლას მადუროს წინააღმდეგ მასშტაბური საპროტესტო აქციები დაიწყო. იმავე დღეს, ვენესუელის ეროვნული ასამბლეის პრეზიდენტმა, ოპოზიციის ლიდერმა ხუან გუაიდომ თავი ქვეყნის დროებით პრეზიდენტად გამოაცხადა.
შეერთებულმა შტატებმა, კანადამ, ბრაზილიამ, არგენტინამ, საქართველომ და სხვა ქვეყნებმა აღიარეს ხუან გუაიდო ვენესუელის დროებით პრეზიდენტად და მოუწოდეს ნიკოლას მადუროს, ხელი არ აღემართა ვენესუელაში მიმდინარე საპროტესტო აქციების მონაწილეების წინააღმდეგ. თავის მხრივ ნიკოლას მადურომ უზენაეს სასამართლოში სიტყვით გამოსვლისას კიდევ ერთხელ გამოაცხადა თავისი ლეგიტიმურობა და გუაიდოს "აშშ-ის მარიონეტი" უწოდა.
ხუან გუაიდოს მხარდაჭერას უცხადებენ ასევე ევროკავშირში. ამასთან საფრანგეთმა ხუან გაიდოს დროებით პრეზიდენტად აღიარების პირობა დაასახელა.
ნიკოლას მადუროს პრეზიდენტობის ლეგიტიმურობას აღიარებენ რუსეთი, თურქეთი, სირია, მექსიკა, კუბა და ბელარუსი.
