არავინ უნდა მისცეს თავს უფლება, ევროპაში თავისუფლად გადაადგილება კითხვის ნიშნის ქვეშ დააყენოს - განაცხადა საქართველოს პრეზიდენტმა, სალომე ზურაბიშვილმა დღეს გამართულ პრეკონფერენციაზე, სადაც ბრიუსელში ვიზიტი შეაჯამა.
სალომე ზურაბიშვილის განცხადებით, მისი ბრიუსელში ვიზიტისას, ევროკავშირის ლიდერებთან ერთად იმსჯელეს ვიზალიბერალიზაციის შედეგებზე. მისი განცხადებით, დღეს არსებული მონაცემებით ვიზალიბერალიზაციით სულ სამასი ათასმა ადამიანმა ისარგებლა და იმოგზაურა ევროპაში. ეს არ არის იმით დაჩრდილული, რომ მოსახლეობის ნაწილი ვიზალიბერალიზაციით სარგებლობს იმ კუთხით, რომ არალეგალურად დარჩეს ევროპაში, ან მოითხოვოს თავშესაფარი.
"ეს არის პრობლემა, რომელზედაც ორმხრივად ვმუშაობთ ჩვენ და ევროკავშირი. ყველამ უნდა გაიაზროს ის, რომ, ვინც არღვევს ამ წესებს და პრინციპებს, ვნებს მომავალს, თავის შვილებს, პირველ რიგში, რადგან საქართველოს მიერ მოპოვებული ეს უფლება ძალიან ძვირფასია, არავინ უნდა მისცეს თავის თავს უფლება, რომ ევროპაში თავისუფლად გადაადგილება კითხვის ქვეშ დააყენოს. დღეს ასე არ დგას ეს საკითხი, მაგრამ ეს არ ნიშნავს, რომ ჩვენ არ უნდა ვიყოთ ფრთხილად“, - აღნიშნა სალომე ზურაბიშვილმა.
