შეერთებული შტატები აფრთხილებს ვენესუელას, რომ თუ ამერიკელ დიპლომატებსა ან ოპოზიციის ლიდერს ხუან გუაიდოს საფრთხე შეექმნებათ, ვაშინგტონი საპასუხო ნაბიჯებს გადადგამს.
აშშ-ის პრეზიდენტის მრჩეველმა ნაციონალური უსაფრთხოების საკითხებში ჯონ ბოლტონმა განაცხადა, რომ ვენესუელის მუქარა კანონის უზენაესობაზე სერიოზულ თავდასხმას წარმოადგენს.
ვენესუელაში მიმდინარე პოლიტიკური კრიზისი დღითიდღე მწვავდება. ვენესუელის ეროვნული ასამბლეის თავმჯდომარემ, ქვეყნის დროებითმა პრეზიდენტმა ხუან გუაიდომ მოქალაქეებს მოუწოდა, 30 იანვარს, მთელი ქვეყნის მასშტაბით გამართონ ახალი ანტისამთავრობო აქციები.
შეგახსენებთ, რომ ოთხშაბათს, 23 იანვარს კარაკასში ვენესუელის ამჟამინდელი პრეზიდენტის ნიკოლას მადუროს წინააღმდეგ მასშტაბური საპროტესტო აქციები დაიწყო. იმავე დღეს, ვენესუელის ეროვნული ასამბლეის პრეზიდენტმა, ოპოზიციის ლიდერმა ხუან გუაიდომ თავი ქვეყნის დროებით პრეზიდენტად გამოაცხადა.
შეერთებულმა შტატებმა, კანადამ, ბრაზილიამ, არგენტინამ, საქართველომ და სხვა ქვეყნებმა აღიარეს ხუან გუაიდო ვენესუელის დროებით პრეზიდენტად და მოუწოდეს ნიკოლას მადუროს, ხელი არ აღემართა ვენესუელაში მიმდინარე საპროტესტო აქციების მონაწილეების წინააღმდეგ. თავის მხრივ ნიკოლას მადურომ უზენაეს სასამართლოში სიტყვით გამოსვლისას კიდევ ერთხელ გამოაცხადა თავისი ლეგიტიმურობა და გუაიდოს "აშშ-ის მარიონეტი" უწოდა.
ხუან გუაიდოს მხარდაჭერას უცხადებენ ასევე ევროკავშირში. ამასთან საფრანგეთმა ხუან გაიდოს დროებით პრეზიდენტად აღიარების პირობა დაასახელა
ნიკოლას მადუროს პრეზიდენტობის ლეგიტიმურობას აღიარებენ რუსეთი, თურქეთი, სირია, მექსიკა, კუბა და ბელარუსი.
