დედოფალმა ელიზაბეტ II-მ ბრიტანელებს მოუწოდა, მოძებნონ საერთო ინტერესები და საკითხები ფართო ჭრილში განიხილონ. როგორც ბრიტანელი ანალიტიკოსები და მედიის წარმომადგენლები ამბობენ, დედოფალმა ფარული მინიშნება გაუგზავნა პოლიტიკოსებს ბრექსიტის კრიზისის დასაძლევად, რომელმაც „შოკში ჩააგდო“ ინვესტორები და მოკავშირე სახელმწიფოები. ინფორმაციას Reuters-ი ავრცელებს.
როგორც ცნობილია, დიდი ბრიტანეთის მთავრობა ბოლო 50 წლის განმავლობაში, ყველაზე დიდ კრიზისში იმყოფება ბრექსიტის საკითხზე ტოტალური შეუთანხმებლობის გამო. ქვეყანამ, რომელმაც 2019 წლის 29 მარტს უნდა დატოვოს ევროკავშირი, ჯერ კიდევ არ აქვს გეგმა, როგორ უნდა გამოვიდეს გაერთიანებიდან, რომელსაც 1973 წელს შეუერთდა.
დედოფალი, ნორფოლკში, ქალთა ინსტიტუტში სიტყვით გამოსვლისას ბრექსიტის კრიზისის პირდაპირ ხსენებას მოერიდა, თუმცა განაცხადა, რომ „ყველანი ვდგავართ ახალი გამოწვევებისა და შესაძლებლობების წინაშე“.
„თანამედროვე ეპოქაში, ჩვენ ვეძებთ პასუხებს კითხვებზე, თუმცა, მე ერთ ხერხს ვანიჭებ უპირატესობას, ვიხელმძღვანელო მაგალითებით. გავერთიანდეთ საერთო ინტერესების ირგვლივ და არასდროს დავკარგოთ უნარი განვიხილოთ საკითხები ფართო ჭრილში“, - განაცხადა დედოფალმა.
ბრიტანეთში მიიჩნევენ, რომ დედოფალმა აღნიშნული სიტყვებით ქვეყნის პოლიტიკურ ელიტას ფარული მინიშნება გაუკეთა, თუმცა ყველა მხარე მის სიტყვებს სხვადასხვანაირად აღიქვამს, მაგალითად, Times-მა შემდეგნაირად დაასათაურა დედოფლის გამოსვლა - „დაასრულეთ ბრექსიტზე დაპირისპირება, დედოფალი პოლიტიკოსებს აფრთხილებს“. BBC-ის თქმით, კი ეჭვგარეშეა, რომ დედოფალმა ნამდვილად გააგზავნა პოლიტიკოსებისადმი ფარული მინიშნებები.
როგორც სახელმწიფოს მეთაური, დედოფალი რჩება პოლიტიკური საკითხებისადმი ნეიტრალური, თუმცა აღსანიშნავია, რომ 2014 წელს, შოტლანდიის რეფერენდუმის დროს, მან განაცხადა, რომ „შოტლანდიელები სიფრთხილით უნდა მოეკიდნონ საკუთარ მომავალს“
