რუსეთის მეცნიერებათა აკადემიის პრეზიდიუმი 22 იანვარს რუსეთის პატრიარქ კირილს (გუნდიაევს) და ფედერაციის საბჭოს სპიკერს ვალენტინ მატვიენკოს „რუსეთის მეცნიერებათა აკადემიის საპატიო პროფესორის“ წოდებას არ მიანიჭებს.
ამის შესახებ რადიო თავისუფლებას აკადემიის ვიცე-პრეზიდენტმა იური ბალეგამ განუცხადა. ამის მიზეზი გახდა აკადემიკოსებისა და მეცნიერების აღშფოთება, რომელიც პატრიარქისა და ფედერაციის საბჭოს თავმჯდომარისთვის საპატიო წოდების მინიჭების შესახებ ინფორმაციის გავრცელებას მოყვა. საპატიო წოდების მინიჭების შესახებ ინფორმაცია 18 იანვარს გავრცელდა. მაშინ აკადემიაში განაცხადეს, რომ რუსეთის მართლმადიდებლური ეკლესიის მეთაური მეცნიერების დიდი პოპულიარიზატორია და მეგობრობს ფიზიკოს სერგეი კაპიცასთან.
2010 წელს პატრიარქი კირილი ბირთვული კვლევითი ეროვნული უნივერსიტეტის საპატიო პროფესორი გახდა, სადაც 2012 წელს თეოლოგიის კათედრა შეიქმნა. ის რამდენიმე სასწავლო დაწესებულებაში საპატიო დოქტორი ან პროფესორია, მათ შორის პეტერბურგის სამხედრო-სამედიცინო აკადემიის, სტრატეგიული დანიშნულების სარაკეტო ჯარების სამხედრო აკადემიისა და დნეპრის ეროვნული უნივერსიტეტის. კირილს დამთავრებული აქვს ლენინგრადის სასულიერო აკადემია, ის ამავე აკადემიას 10 წლის განმავლობაში ხელმძღვანელობდა.
