ევროპული საბჭოს პრეზიდენტი დონალდ ტუსკი ბრიტანეთის პარლამენტში ბრექსიტის შეთანხმების ჩავარდნას მიკრობლოგ „ტვიტერის“ საშუალებით გამოეხმაურა.
„თუ შეთანხმება შეუძლებელია და ეს შეთანხმების გარეშე არავის სურს [ევროკავშირიდან] გასვლა, მაშინ ვის ექნება საკმარისი გამბედაობა, რომ თქვას თუ რა არის ერთადერთი პოზიტიური გამოსავალი?“, - წერს ევროპული საბჭოს პრეზიდენტი დონალდ ტუსკი მიკრობლოგ „ტვიტერზე“.
შეგახსენებთ, რომ ბრიტანეთის პარლამენტარებმა ქვეყნის პრემიერ-მინისტრის ტერეზა მერის მიერ შემოთავაზებულ ევროკავშირთან შეთანხმების დოკუმენტს მხარი არ დაუჭირეს. 432 დეპუტატი წინააღმდეგ გამოვიდა, ხოლო 202 დეპუტატმა მხარი დაუჭირა ბრექსიტის შეთანხმებას. დიდი ბრიტანეთის ისტორიაში ამ დოკუმენტის ჩავარდნა მთავრობის ერთ-ერთ ყველაზე დიდ მარცხად შეფასდა.
ოპოზიციური პარტიის, ლეიბორისტების ლიდერმა ჯერემი კორბინმა პრემიერ-მინისტრ ტერეზა მეისთვის უნდობლობის გამოცხადება მოითხოვა. კენჭისყრა ბრიტანეთის პარლამენტში დღეს გაიმართება.
