დიდი ბრიტანეთის პრემიერ-მინისტრი ტერეზა მეი, "ბრექსიტის" შეთანხმების კენჭისყრამდე, კიდევ ერთხელ მიმართავს ბრიტანეთის პარლამენტს და მოუწოდებს მიიღონ ისეთი გადაწყვეტილება, რაც ქვეყნისთვის იქნება საჭირო.
"რეფერენდუმის შედეგები ყველასთვის ნათელი იყო - ბრიტანელ ხალხს სურს, მათი მომავალი ევროკავშირის წევრობის გარეშე წარიმართოს. ასე, რომ ჩემი გზავნილი პარლამენტისადმი არის ძალიან მარტივი: დროა დაივიწყოთ თამაშები და გააკეთოთ ის, რაც ჩვენს ქვეყანას სჭირდება", - დაწერა ტერეზა მეიმ მიკრობლოგ "ტვიტერზე".
დიდი ბრიტანეთის პარლამენტში ბრექსიტის შეთანხმების კენჭისყრა 14-15 იანვარს უნდა გაიმართოს.
ცოტა ხნის წინ, ტერეზა მეიმ ასევე განაცხადა, რომ ის მხარს არ უჭერს რეფერენდუმის ჩატარებას, რადგან ამან შეიძლება საზოგადოების დაყოფა გამოიწვიოს.
„მიმაჩნია, რომ ხელახალი რეფერენდუმის ჩატარება იქნება იმ მოქალაქეებისთვის უპატივცემლობის გამოცხადება, რომლებმაც ქვეყნის ევროკავშირიდან გასვლას უკვე მხარი დაუჭირეს“, - განაცხადა ტერეზა მეიმ.
შეგახსენებთ, რომ დიდი ბრიტანეთის პრემიერ-მინისტრმა ტერეზა მეიმ პარლამენტში 11 დეკემბერს დაგეგმილი კენჭისყრა Brexit-ის შეთანხმების შესახებ გადადო.
