იუსტიციის უმაღლესი საბჭოს ფორმირების წესთან დაკავშირებით გუნდში განსხვავებული მოსაზრებები იყო, - ამის შესახებ ჟურნალისტებს უმრავლესობის დეპუტატმა გედევან ფოფხაძემ განუცხადა.
მისი თქმით, მისი და ეკა ბესელიას პოზიცია იყო, რომ რადიკალურად შეცვლილიყო იუსტიციის საბჭოს ფორმირების წესი და სხვა კონფიგურაცია შექმნილიყო.
„იყო განსხვავებული მოსაზრება, რომ ეს სასამართლოს დამოუკიდებლობის ხელყოფას ნიშნავდა. ვისმა პოზიციამაც გაიმარჯვა, იმძლავრა და ვისი გემოვნებითაც მოხდა შემდგომში იუსტიციის საბჭოში პროცესების განვითარება, ის შედეგებიც მივიღეთ“, - განაცხადა ფოფხაძემ.
ფოფხაძის განცხადებით, ის იუსტიციის უმაღლეს საბჭოში პარლამენტის კვოტით დასახელებულ კანდიდატებს ხმას აძლევდა. მისივე განცხადებით, არჩეული კანდიდატებისგან ვერავითარ წინასწარ გარანტიას ვერ მიიღებდა, თუ როგორ გადაწყვეტილებებს მიიღებდნენ ისინი იუსტიციის უმაღლეს საბჭოში. შესაბამისად, ფოფხაძე ამბობს, რომ მის მიერ არჩეულ ადამიანებზე რაღაც დონის პასუხისმგებლობა აქვს, მაგრამ ეს ვერ იქნება პირდაპირი პასუხისმგებლობა.
