საქართველოს პარლამენტის თავჯდომარის, ირაკლი კობახის განცხადებით, უკრაინის ეკლესიის ავტოკეფალიის საკითხზე მმართველი გუნდი საპატრიარქოსთან კონსულტაციებს გამართავს.
მისივე თქმით, კონსულტაციები ასევე გაიმართება უკრაინელ პარტნიორებთან და სწორედ ამის შემდეგ გახდება მმართველი გუნდის პოზიცია ცნობილი.
„ჩვენ გვაქვს ძალიან მჭიდრო კავშირი ჩვენს უკრაინელ მეგობრებთან, განსაკუთრებით, მჭიდროა პარლამენტებს შორის კავშირები, გვაქვს მუდმივი კომუნიკაცია, მე პირადად - უკრაინის რადას თავმჯდომარესთან. ზოგადად, თქვენ იცით, რომ ძალიან გააქტიურებულია პარლამენტებს შორის ურთიერთობები, ერთობლივი საპარლამენტო ასამბლეაც შევქმენით ჩვენს მოლდოველ მეგობრებთან ერთად. შესაბამისად, თანამშრომლობა არის მჭიდრო, არის აქტიური, ჩვენ გვექნება, რა თქმა უნდა, ჩვენს უკრაინელ მეგობრებთან საუბარი ამ თემაზეც, ასევე, გვექნება, ბუნებრივია, საპატრიარქოსთან საუბარი, პატრიარქთან საუბარი, და ამის საფუძველზე გახმოვანდება ჩვენი გზავნილები",- განაცხადა პარლამენტის თავმჯდომარემ.
ცნობისთვის, უკრაინის მართლმადიდებელი ეკლესიისთვის ავტოკეფალიის მინიჭების შესახებ ტომოსს კონსტანტინეპოლის პატრიარქმა ხელი 5 იანვარს მოაწერა.