პარლამენტის იურიდიულ საკითხთა კომიტეტის თავმჯდომარის თანამდებობაზე უმრავლესობის წევრი ანრი ოხანაშვილი განიხილება.
როგორც დღეს ფრაქცია „ქართული ოცნების“ თავმჯდომარემ, მამუკა მდინარაძემ განაცხადა, გადაწყვეტილებას გუნდი მიიღებს, ხოლო პირველი მოადგილის წარდგენის შესაძლებლობა კი, როგორც ამას რეგლამენტი ითვალისწინებს, კომიტეტის ახალ თავმჯდომარეს უნდა ჰქონდეს.
„ანრი ოხანაშვილის კანდიდატურა არის ერთ-ერთი, რომელიც სამომავლოდ განიხილება იურიდიული კომიტეტის თავმჯდომარის თანამდებობაზე, მაგრამ წინასწარ ამაზე საუბარი არ შეიძლება, ამაზე გადაწყვეტილება უნდა მიიღოს გუნდმა“, – განაცხადა მდინრაძემ.
რაც შეეხება კითხვას ვანო ზარდიაშვილის შესახებ, მდინარაძის თქმით, ზარდიაშვილი კომიტეტის წევრია და მისი ინფორმაციით, სამომავლოდ, ამ თანამდებობაზე პრეტენზიის გამოთქმას არ აპირებს.
„ვანო ზარდიაშვილი იურიდიულ საკითხთა კომიტეტის წევრია. მან პირველი მოადგილის თანამდებობიდან წასვლაზე დაწერა განცხადება და მე როგორც ვიცი, არ აპირებს მომავალში ამ პოზიციაზე რამე პრეტენზია განაცხადოს“, – განაცხადა მდინარაძემ.
საპარლამენტო უმრაველსობაში დაპირისპირება უზენაესი სასამართლოს მოსამართლეობის კანდიდატების სიას მოჰყვა, რის გამოც ეკა ბესელიამ პარლამენტის იურიდიული კომიტეტის თავმჯდომარის დანამდებობა დატოვა. თანამდებობა ასევე დატოვა იურიდიული კომიტეტის პირველმა მოადგილემ, ვანო ზარდიაშილმა. ბესელია და მისი მხარდამჭერები უმრავლესობიდან, უზენაესი სასამართლოს მოსამართლეობის კანდიდატების სიის სრულად შეცვლას და სიის დაკომპლექტებისთვის კანონმდებლობის გადახედვას ითხოვს. ეკა ბესელიამ განაცხადა, რომ ის გუნდიდან წასვლას არ აპირებს და ბრძოლას გააგრძელებს.
„ქართული ოცნების“ ოფისში ფრაქცია „ქართული ოცნების“ სხდომა გაიმართა, რომელსაც პარტიის თავმჯდომარე ბიძინა ივანიშვილი ესწრებოდა. სხდომაზე გედევან ფოფხაძის იურიდიული კომიტეტიდან გაწვევის გადაწყვეტილება მიიღეს. გედევან ფოფხაძე იურიდიული კომიტეტის თავმჯდომარის პირველ მოადგილედ 2018 წლის 31 დეკემბერს აირჩიეს. მას შემდეგ, რაც ეკა ბესელიამ კომიტეტის თავმჯდომარის პოსტი დატოვა.
