აშშ-ის პრეზიდენტმა დონალდ ტრამპმა ვლადიმერ პუტინთან, არგენტინაში „დიდი ოცეულის“ ფარგლებში, დაგეგმილი შეხვედრა გააუქმა. ამის შესახებ ინფორმაცია ტრამპმა მიკრობლოგ „ტვიტერზე“ გამოაქვეყნა.
ტრამპის თქმით, შეხვედრის გაუქმების მიზეზი, უკრაინაში, ქერჩის სრუტეში განვითარებული მოვლენებია.
„თუ გავითვალისწინებთ იმას, რომ რუსეთს გემები და მეზღვაურები უკრაინისთვის ჯერ კიდევ არ გადაუცია, გადავწყვიტე, ამ საკითხით შეშფოთებული ყველა მხარისთვის უმჯობესი იქნება, თუ დაგეგმილ შეხვედრას გავაუქმებთ“, - წერს ტრამპი.
შეხვედრის შესაძლო გაუქმების შესახებ მედიაში ინფორმაცია რამდენჯერმე გავრცელდა, თუმცა კრემლი ამ ინფორმაციის დადასტურებისგან თავს იკავებდა. დონალდ ტრამპმა კი საბოლოოდ ნათელი მოჰფინა ამ საკითხს.
