"გერმანიის კანცლერი ანგელა მერკელი შეშფოთებას გამოთქვამს რუსული აგრესიის ესკალაციის გამო და ის ყველაფერს იღონებს სიტუაციის დარეგულირებისთვის", - აღნიშნულ ინფორმაციას უკრაინის პრეზიდენტის პრესმდივანი სვიატოსლავ ცეგოლკო "ფეისბუკზე" ავრცელებს.
ცეგოლკოს თქმით, პრეზიდენტი პოროშენკოსა და გერმანიის კანცლერს შორის სატელეფონო საუბარი შედგა. უკრაინის პრეზიდენტმა ანგელა მერკელს ქერჩის სრუტესთან განვითარებული მოვლენებისა და უკრაინაშ საომარი მდგომარეობის გამოცხადების შესახებ უამბო.
უკრაინის პრეზიდენტმა პეტრე პოროშენკომ ხელი მოაწერა განკარგულებას ქვეყანაში საომარი მდგომარეობის გამოცხადების შესახებ.
"საომარი მდგომარეობა 60 დღის განმავლობაში , 2018 წლის 26 ნოემბრის 15:00 საათიდან, 2019 წლის 25 იანვრის 15:00 გაგრძელდება", - აღნიშნულია განკარგულებაში.
შეგახსენებთ, რომ 25 ნოემბერს, რუსეთის მხრიდან უკრაინული გემების მიმართ თავდასხმა განხორციელდა.რუსი სამხედროების თავდასხმის შედეგად დაიჭრა 6 უკრაინელი. ყირიმის ავტონომიურ რესპუბლიკაში უკრაინის პრეზიდენტის წარმომადგენელის, ბორის ბაბინის განაცხადებით, რუს მესაზღვრეებს 20-ზე მეტი უკრაინელი სამხედრო ჰყავთ დაკავებული.
გვიან ღამით, უკრაინაში ქვეყნის თავდაცვისა და უსაფრთხოების ეროვნული საბჭოს საგანგებო სხდომა გაიმართა, სადაც პრეზიდენტმა პოროშენკომ მხარი დაუჭირა სამხედრო კაბინეტის წინადადებას, უკრაინაში საომარი მდგომარეობის გამოცხადების შესახებ.
