ქერჩის სრუტეში განხორციელებული თავდასხმის გამო, უკრაინა მოუწოდებს ევროკავშირს, სანქციები დაუწესოს რუსეთს.
"ჩვენ უნდა შევაჩეროთ კრემლის მიერ დაგეგმილი ომი უკრაინის წინააღმდეგ, ამისთვის ჩვენ გვჭირდება ახალი სანქციები რუსეთის წინააღმდეგ", - აცხადებს ევროკავშირში უკრაინის მისიის ხელმძღვანელი მიკოლა ტოჩიცკი.
გარდა ამისა, უკრაინა მოუწოდებს ევროკავშირის უმაღლეს წარმომადგენელს საგარეო და უსაფრთხოების საკთხებში ფედერიკა მოგერინის, დააყენოს აღნიშნული საკითხი დღეს დაგეგმილ საგარეო საქმეთა საბჭოს სხდომაზე.
შეგახსენებთ, რომ ქერჩის სრუტეში რუსმა სამხედროებმა უკრაინის სამ სამხედრო კატერს ცეცხლი გაუხსნეს და ხომალდები დაატყვევეს. კიევის ცნობით, დაჭრილია ექვსი უკრაინელი სამხედრო. რუსული მხარის მიერ დაკავებულ უკრაინულ ხომალდებზე 23 ადამიანი იმყოფებოდა. მათთან კონტაქტი ამ დრომდე ვერ ხერხდება. კიევი აცხადებს, რომ ორი ბრონირებული კატერი და ბუქსირი ოდესიდან მარიუპოლში მიცურავენ, რის შესახებაც რუსები ინფორმირებული იყვნენ. მოსკოვის მტკიცებით, უკრაინულმა გემებმა რუსეთის საზღვარი დაარღვიეს და მომხდარს კიევის მიერ განხორციელებულ პროვოკაციას უწოდებენ. გვიან ღამით, უკრაინაში ქვეყნის თავდაცვისა და უსაფრთხოების ეროვნული საბჭოს საგანგებო სხდომა გაიმართა, სადაც პრეზიდენტმა პოროშენკომ მხარი დაუჭირა სამხედრო კაბინეტის წინადადებას, უკრაინაში საომარი მდგომარეობის გამოცხადების შესახებ.
