"გახლიჩა რა უკრაინა ორ ნაწილად, პოროშენკო და მთელი მაიდანის კამპანია დაიწყებენ მთელ მსოფლიოში გასტროლს დემოკრატიის შესახებ ლექციებით, როგორც ამას სააკაშილი აკეთებს", - ასე ეხმიანება უკრაინაში, ქერჩის სრუტეში მიმდინარე მოვლენებს რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა.
ზახაროვა უკრაინულ მხარეს ადანაშაულებს პროვოკაციის მოწყობასა და ვითარების ესაკალაციაში.
"დონბასში მშვიდობა უკვე დაამყარეს. ახლა ქერჩის სრუტეს მიადგნენ, ყაჩაღები დიდი გზიდან. მეთოდებიც ყაჩაღური აქვთ - ჯერ პროვოკაცია, შემდეგ ძალისმიერი ზეწოლა, შემდეგ კი აგერსიაში დადანაშაულება", - ნათქვამია ზახაროვას განცხადებაში, რომელსაც ის ფეისბუკზე აქვეყნებს.
შეგახსენებთ, რომ ქერჩის სრუტეში რუსმა სამხედროებმა უკრაინის სამ სამხედრო კატერს ცეცხლი გაუხსნეს და ხომალდები დაატყვევეს. კიევის ცნობით, დაჭრილია ექვსი უკრაინელი სამხედრო. რუსული მხარის მიერ დაკავებულ უკრაინულ ხომალდებზე 23 ადამიანი იმყოფებოდა. მათთან კონტაქტი ამ დრომდე ვერ ხერხდება. კიევი აცხადებს, რომ ორი ბრონირებული კატერი და ბუქსირი ოდესიდან მარიუპოლში მიცურავენ, რის შესახებაც რუსები ინფორმირებული იყვნენ. მოსკოვის მტკიცებით, უკრაინულმა გემებმა რუსეთის საზღვარი დაარღვიეს და მომხდარს კიევის მიერ განხორციელებულ პროვოკაციას უწოდებენ. გვიან ღამით, უკრაინაში ქვეყნის თავდაცვისა და უსაფრთხოების ეროვნული საბჭოს საგანგებო სხდომა გაიმართა, სადაც პრეზიდენტმა პოროშენკომ მხარი დაუჭირა სამხედრო კაბინეტის წინადადებას, უკრაინაში საომარი მდგომარეობის გამოცხადების შესახებ.
