ევროკავშირმა და გაერთიანებულმა სამეფომ მიიღეს ერთობლივი სამომავლო თანამშრომლობის გეგმა, მას შემდეგ რაც ბრიტანეთი ოფიციალურად დატოვებს ევროკავშირს.
ევროპული საბჭოს განცხადებით, აღნიშნული დოკუმენტი მოიცავს ბრიტანეთსა და ევროკავშირს შორის სავაჭრო ურთიერთობებს, უსაფრთხოებისა და სხვა მნიშვნელოვანი საკითხების ირგვლივ მხარეების თანამშრომლობას.
ევროპული საბჭოს პრეზიდენტი დონალდ ტუსკი მიკრობლოგ ტვიტერზე გამოეხმაურა დოკუმენტს და აღნიშნა, რომ ევროკავშირი და ბრიტანეთი შეთანხმდნენ დოკუმენტში მოცემულ პირობებზე და ახლა ის ევროკავშირის წევრმა ქვეყნებმაც უნდა მოიწონონ.
შეგახსენებთ, რომ ინტენსიური მოლაპარაკების შედეგად, ბრექსიტთან დაკავშირებით ბრიტანეთმა და ევროკავშირმა ტექნიკურ დონეზე შეთანხმებას მიაღწიეს. დოკუმენტის გასაჯაროვების შემდეგ თანამდებობა ბრიტანეთის მთავრობის რამდენიმე წევრმა დატოვა.
ბრექსიტთან დაკავშირებით ევროკავშირის სამიტი 25 ნოემბერს გაიმართება, სადაც მხარეები ოფიციალურად გააფორმებენ შეთანხმების მიღწევას ბრიტანეთის ევროკავშირიდან გასვლის შესახებ.
იმისათვის, რომ ბრექსიტის შეთანხმება სრულად იქნეს მხარდაჭერილი, ამისთვის საჭიროა ბრიტანეთის პარლამენტისა და ევროკავშირის წევრი ქვეყნების თანხმობა.
დიდმა ბრიტანეთმა ევროკავშირი 2019 წლის 29 მარტს უნდა დატოვოს.
