დიდი ბრიტანეთის პრემიერ მინისტრის ტერეზა მეის რეიტინგი, ბოლო დღეების განმავლობაში გაიზარდა. მიუხედავად იმისა, რომ გასულ კვირას ბრექსიტის შეთანხმების დოკუმენტის გასაჯაროვების შემდეგ, მის მიმართ უკმაყოფილების დიდი ტალღა წარმოიშვა, მათ შორის პარლამენტსა და თავისივე მთავრობაში, სულ უფრო და უფრო მეტ ადამიანს სურს მეის პრემიერ მინისტრად დარჩენა.
სოციოლოგიური კვლევის მიხედვით, რომელიც გამოცემა Daily Mail-მა გამოაქვეყნა, კვლევაში მონაწილე რესპონდენტების 46 პროცენტს სურს, რომ ტერეზა მეი პრემიერის პოსტზე დარჩეს.
გასულ კვირას ეს მაჩვენებელი (ანუ იმ ადამიანების რიცხვი ვისაც მეის პრემიერად დარჩენას ემხრობოდა) 33 პროცენტს შეადგენდა.
შეგახსენებთ, რომ ინტენსიური მოლაპარაკების შედეგად, ბრექსიტთან დაკავშირებით ბრიტანეთმა და ევროკავშირმა ტექნიკურ დონეზე შეთანხმებას მიაღწიეს. დოკუმენტის გასაჯაროვების შემდეგ თანამდებობა ბრიტანეთის მთავრობის რამდენიმე წევრმა დატოვა.
ბრექსიტთან დაკავშირებით ევროკავშირის სამიტი 25 ნოემბერს გაიმართება, სადაც მხარეები ოფიციალურად გააფორმებენ შეთანხმების მიღწევას ბრიტანეთის ევროკავშირიდან გასვლის შესახებ.
იმისათვის, რომ ბრექსიტის შეთანხმება სრულად იქნეს მხარდაჭერილი, ამისთვის საჭიროა ბრიტანეთის პარლამენტისა და ევროკავშირის წევრი ქვეყნების თანხმობა.
დიდმა ბრიტანეთმა ევროკავშირი 2019 წლის 29 მარტს უნდა დატოვოს.
