ეს განცხადება სისხლის სამართლის დანაშაულის ნიშნებს შეიცავს და პარლამენტის ხელმძღვანელობამ დაუყონებლივ უნდა გააკეთოს განცხადება იმის თაობაზე, რომ ის დეპუტატის პოზიციას ემიჯნება, გედევან ფოფხაძემ კი, საზოგადოების წინაშე ბოდიში უნდა მოიხადოს, - ამის შესახებ ფრაქცია „ნაციონალური მოძრაობის“ თავმჯდომარე რომან გოცირიძემ განაცხადა.
მისი თქმით, გედევან ფოფხაძემ უკიდურესად დიდი უპასუხისმგებლობა გამოიჩინა.
„ეს არის დანაშაულებრივი განცხადება, რომელიც სისხლის სამართლის დანაშაულის ნიშნებს შეიცავს. საზოგადოებაში მსგავსი განწყობილების შექმნა მიმართულია საარჩევნო პროცესებზე ზემოქმედებისკენ, რადგან „ქართული ოცნების“ კანდიდატი ოპოზიციის შედეგს 300 ათასი ხმით ჩამორჩება. ამის ანაზღაურება ორ კვირაში შეუძლებელია და ხალხის დაშინებას ყველანაირად ცდილობენ. ეს უპასუხისმგებლო განცხადებები ამ მიზნებს ემსახურება. არჩევნებზე მაღლა ქვეყნის უსაფრთხოება და ხალხის კეთილდღეობა დგას. ვინც მსგავს განცხადებას აკეთებს, პარლამენტში მისი ადგილი არ არის. უმრავლესობამ ანტიკონსტიტიციურ განცხადებას უნდა გაემიჯნოს”, – განაცხადა რომან გოცირიძემ.
ცნობისთვის, გედევან ფოფხაძემ დღეს განაცხადა, რომ თუ გრიგოლ ვაშაძე საპრეზიდენტო არჩევნებს მოიგებს, ეს სამოქალაქო ომს გამოიწვევს.
