ხორავას ქუჩაზე მომხდარი მკვლელობის საქმის ფარგლებში მოწმეზე ზემოქმედებისა და მოსყიდვის ბრალდებით დაკავებული მერაბ მორჩაძის სისხლის სამართლის საქმის პროკურორის, მირიან მეგრელიშვილის განმარტებით, დღეს დაკითხულმა მიხეილ კალანდიამ გამოძიების ეტაპზე მიცემული ჩვენება დაადასტურა.
"დღევანდელ პროცესზე გაიმართა არსებითი განხილვა. დაიწყო ბრალდების მხარის მტკიცებულებების გამოკვლევა. დაიკითხა მოწმის სახით მიხეილ კალანდია. დეტალებზე ვერ მოგახსენებთ, ვინაიდან პროცესი დახურული იყო, თუმცა გეტყვით, რომ მოწმემ დაადასტურა გამოძიების ეტაპზე მიცემული ჩვენებები და ისაუბრა ბრალდების კონკრეტულ ელემენტებზე, რომელიც ბრალად აქვს წარდგენილი მერაბ მორჩაძეს", - განაცხადა მირიან მეგრელიშვილმა.
მიხეილ კალანდიამ დაკითხვის შემდეგ სასამართლო კომენტარის გარეშე დატოვა.
კალანდიას დაკითხვა სასამართლოში დახურულ რეჟიმში მიმდინარეობდა.
შეგახსენებთ, 1973 წელს დაბადებული მერაბ მორჩაძე 8 ივნისს სსკ-ის 372-ე მუხლით დააკავეს, რაც მოწმეზე ზემოქმედებას გულისხმობს. საუბარია საქმის ერთ-ერთ მთავარ მოწმე მ.კ-ზე. გამოძიების ინფორმაციით, მორჩაძემ მას ურჩია, არ მიეცა ბრალდებულების წინააღმდეგ ჩვენება, მკვლელობიდან თვენახევარში კი მას ამის სანაცვლოდ თანხა 100 ლარის ოდენობით გადასცა.
