სააფთიაქო ნარკომანიის საქმეზე ბრალდებული 6 პირის აღკვეთის ღონისძიების შეფარდებაზე სასამართლო ამ დრომდე მსჯელობს.
პროკურატურის შუამდგომლობას, ბრალდებულის მიმართ აღკვეთის ღონისძიების სახით პატიმრობის გამოყენების თაობაზე მისმა ადვოკატებმა უპასუხეს. ერთ-ერთი დაკავებულის, ნათელა მამულაშვილის ადვოკატების განცხადებით, ბრალდებული აღიარებს დანაშაულს, კერძოდ უკანონო სამეწარმეო საქმიანობას და გამოძიებასთან თანამშრომლობს. ადვოკატები მის გათავისუფლებას გირაოს სანაცვლოდ, საცხოვრებელი სახლის უზრუნველყოფით ითხოვენ.
ადვოკატებმა ნათელა მამულაშვილის ჯანმრთელობის მდგომარეობაზეც ისაუბრეს.
დანაშაულს აღიარებს და უკანონო სამეწარმეო საქმიანობაში თავს დამნაშავედ ცნობს კიდევ ერთი ბრალდებული ნინო კორძაია. მისმა ადვოკატებმა ბრალდებულის მიმართ 10 ათას ლარიანი გირაოს გამოყენება იშუამდგომლეს და აღნიშნეს, რომ არ არსებობს არავითარი საფუძველი, რათა ბრალდებულს მკაცრი აღკვეთის ღონისძიება შეეფარდოს.
თავის მხრივ ბრალდებულმა ნინო კორძაიამ აღნიშნა, რომ დაუშვა შეცდომა და ამას გულწრფელად ინანიებს. კორძაიას თქმით მის ქმედებას გამართლება არ აქვს.
შეგახსენებთ, რომ სუს-მა ე.წ. სააფთიაქო ნარკომანიის სფეროში ფსიქოტროპული საშუალებების უკანონო ბრუნვის საქმეზე სამსახურებრივი უფლებამოსილების ბოროტად გამოყენების ფაქტზე ჯანდაცვის სამინისტროს სსიპ სამედიცინო საქმიანობის სახელმწიფო რეგულირების სააგენტოს უფროსი გია თვალავაძე დააკავა. ასევე, ბრალდებულის სახით დაკავებულები არიან უკანონო სამეწარმეო საქმიანობაში ჩართული კიდევ 5 პირი.
