ლგბტ სიმბოლიკას სახელმწიფო პროვოკაციად აღიქვამს და უსაფრთხოების უზრუნველსაყოფად, ძალადობრივად განწყობილი მოქალაქეების პასუხისგებაში მიცემის მაგივრად, ჩაგრული ჯგუფების გამოხატვის თავისუფლებას ზღუდავს, - ამის შესახებ "თანასწორობის მოძრაობის" განცხადებაშია აღნიშნული, რომელიც 9 სექტემებერს, დინამო არენასთან განვითარებულ მოვლენებს ეხება.
როგორც განცხადებაშია ნათქვამი, 9 სექტემბერს, დინამოს სტადიონზე, საქართველოსა და ლატვიის საფეხბურთო ნაკრებებს შორის თამაშზე, ლგბტ აქტივისტებს სამართალდამცავმა ორგანოებმა, ლგბტ სიმბოლიკა ძალის გამოყენებით ჩამოართვეს და მათი სტადიონზე შეტანის საშუალება არ მისცეს.
"თანასწორობის მოძრაობა" მიიჩნევს, რომ საქართველოს ხელისუფლება მსგავსი ნაბიჯებით ახალისებს ნეოფაშისტური დაჯგუფებების ძალადობრივ საქმიანობას საქართველოში.
არასამთავრობო ორგანიზაიცია აპირებს უეფა-ს, გენერალურ ინსპექციას, სახალხო დამცველსა და სასამართლოს მიმართოს.
"9 სექტემბერს, დინამოს სტადიონზე, საქართველოსა და ლატვიის საფეხბურთო ნაკრებებს შორის თამაშზე, ლგბტ აქტივისტებს სამართალდამცავმა ორგანოებმა, ლგბტ სიმბოლიკა ძალის გამოყენებით ჩამოართვეს და მათი სტადიონზე შეტანის საშუალება არ მისცეს. აღნიშნულ თამაშზე გურამ კაშიას მიერ ლგბტ თემისადმი მხარდაჭერის გამოხატვის გამო, საზოგადოების ნაწილი მადლობის ნიშნად მხარდამჭერი დროშების და სხვა ატრიბუტიკის შეტანას აპირებდა. ადგილზე მობილიზებული იყვნენ სამართალდამცავები, რომლებიც ჩხრეკდნენ გულშემატკივრებს და ლგბტ სიმბოლიკის და დროშის აღმოჩენის შემთხვევაში, სტუმრებს მათ დატოვებას აიძულებდნენ. სტადიონზე აქტივისტებს მხოლოდ იმ ბანერების შეტანის საშუალება მისცეს, რომლებზეც გურამ კაშიას ლგბტ სამკლაური არ ეკეთა. აღსანიშნავია, რომ ლგბტ აქტივისტები მოქმედებდნენ დინამოს სტადიონის წესების მიხედვით, რომელიც არ კრძალავს აღნიშნული მასალის სტადიონის ტერიტორიაზე შეტანას. სამართალდამცავების მხრიდან ცენზურის მიუხედავად, სტადიონზე რამდენიმე აქტივისტმა მაინც შეძლო გარკვეული ატრიბუტიკის მალულად შეტანა. თუმცა, ლგბტ დროშის გაშლისას, აქტივისტებს აღნიშნული დროშა პოლიციამ წაართვა.
აღსანიშნავია, რომ ლგბტ ადამიანებისთვის გამოხატვის თავისუფლების შეზღუდვა წლების განმავლობაში ერთ-ერთ მთავარ გამოწვევად რჩება. წლებია, ლგბტ აქტივისტები ცდილობენ მშვიდობიანად შეიკრიბონ და გამოხატონ თავიანთი პოზიცია არსებული ჩაგვრის და ძალადობის წინააღმდეგ. სამწუხაროდ, კონსტიტუციით გარანტირებული ამ უფლების რეალიზება საქართველოში ერთადერთი ჯგუფისთვის - ლგბტ ადამიანებისთვის - კვლავაც შეუძლებელია. სახელმწიფო თავს არიდებს საკუთარი მოვალეობის შესრულებას და უსაფრთხოების მოტივით ცდილობს ლგბტ ადამიანების ხილვადობის ჩახშობას. ლგბტ სიმბოლიკას სახელმწიფო პროვოკაციად აღიქვამს და უსაფრთხოების უზრუნველსაყოფად, ძალადობრივად განწყობილი მოქალაქეების პასუხისგებაში მიცემის მაგივრად, ჩაგრული ჯგუფების გამოხატვის თავისუფლებას ზღუდავს. აღსანიშნავია, რომ სწორედ ლგბტ სიმბოლიკის არდაშვების გაცხადებული მოთხოვნა ჰქონდათ ნეოფაშისტურ ჯგუფებს თამაშამდე. ისინი მოითხოვდნენ, რომ აკრძალულიყო ლგბტ დროშების შეტანა სტადიონზე. სწორედ ამ შემთხვევაში გააუქმებდნენ ისინი მათ მუქარის შემცველ აქციას. სამწუხაროდ, სახელმწიფომ კიდევ ერთხელ დასვა ტოლობის ნიშანი ჩაგრული ჯგუფსა და მოძალადე ფაშისტური დაჯგუფებებს შორის და მუქარას დაემორჩილა ლგბტ აქტივისტების გაჩუმების გზით.
თანასწორობის მოძრაობა მიიჩნევს, რომ საქართველოს ხელისუფლება მსგავსი ნაბიჯებით ახალისებს ნეოფაშისტური დაჯგუფებების ძალადობრივ საქმიანობას საქართველოში. ჩვენი შეფასებით, შსს-ს ამგვარი ქმედებები მიანიშნებს იმაზე, რომ აღნიშნული ნეოფაშიტური ჯგუფები სახელმწიფოს ხელში აქტივისტების გასაჩუმებლად გამოიყენებიან.
თანასწორობის მოძრაობა, როგორც ლგბტ საკითხებზე მომუშავე ორგანიზაცია, აპირებს მიმართოს საერთაშორისო ორგანიზაციებს, მათ შორის უეფას, რეაგირების მოსახდენად. დამატებით, პოლიციის მხრიდან დისკრიმინაციული მოტივით გამოხატვის თავისუფლების შეზღუდვის გამო თანასწორობის მოძრაობა მიმართავს გენერალურ ინსპექციას, სახალხო დამცველსა და სასამართლოს", - ნათქვამია განცხადებაში.
