ამ წუთებში თბილისის საქალაქო სასამართლოში ბუტა რობაქიძის მკვლელობის საქმეზე შსს-ს ყოფილი მაღალჩინოსნების მხრიდან სამსახურეობრივი უფლებამოსილების ბოროტად გამოყენების საქმეზე სასამართლო პროცესი მიმდინარეობს.
როგორც საქმის პროკურორმა, დავით ნეფარიძემ „ჯი-ეიჩ-ენს“ განუცხადა, დღეს ბრალდების მხარე გამომძიებელს გამოკითხავს და სავარაუდოდ, ამით დაასრულებს სახელმწიფო ბრალდება თავისი მტკიცებულებების გამოკვლევას.
ერთ-ერთი ბრალდებულის, ზურაბ მიქაძის ადვოკატის, ზაზა შანავას განცხადებით, დარჩენილია დაცვის მხარის მოწმეების გამოკითხვა.
„ბრალდების მხარემ დაასრულა მტკიცებულებების წარმოდგენა, რომელიც ბრალდების მხარის მიერ საქმის მასალებში იყო წარმოდგენილი. დარჩენილია დაცვის მოწმეების წარმოდგენა, მათი მტკიცებულებების გამოკვლევა. სავარაუდოდ, ეს დღეიდან დაიწყება. ვინ იქნება წარმოდგენილი, რა ფორმით და რა მტკიცებულებები რა თანმიმდევრობით, ეს ჩვენთვის უცნობია“, - აცხადებს შანავა.
ცნობისთვის, ბუტა რობაქიძის მკვლელობის საქმეზე სამსახურეობრივი უფლებამოსილების ბოროტად გამოყენებაში 6 პირია ბრალდებული: გურამ დონაძე, ზაზა ბაქრაძე, ზურა მიქაძე, ლევან გვაზავა, ირაკლი ფირცხალავა და დავით იაშვილი არიან ბრალდებული.
ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, 30 მარტს, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.
