საქართველოსა და აზერბაიჯანის ფინანსთა სამინისტროებს შორის თანამშრომლობის პერსპექტივა განიხილეს საქართველოს ფინანსთა მინისტრმა, ივანე მაჭავარიანმა და აზერბაიჯანის ფინანსთა მინისტრმა, სამირ შარიფოვმა ბაქოში გამართული ორმხრივი შეხვედრისას.
მინისტრებმა ისაუბრეს ორ ქვეყანას შორის სავაჭრო-ეკონომიკური ურთიერთობების განვითარების აუცილებლობაზე. საუბარი შეეხო საბიუჯეტო და საგადასახადო პოლიტიკის საკითხებს, ბიზნესგარემოს გაუმჯობესებისთვის საქართველოსა და აზერბაიჯანის მთავრობების მიერ დაგეგმილ ღონისძიებებს.
ივანე მაჭავარიანმა აზერბაიჯანელ კოლეგას გააცნო საქართველოს ეკონომიკაში არსებული ვითარება, წლის დასაწყისიდან დაფიქსირებული პოზიციური მაკროეკონომიკური მაჩვენებლები, ეკონომიკური და სტრუქტურული რეფორმები.
შეხვედრის დასასრულს, მხარეებმა კიდევ ერთხელ, ხაზი გაუსვეს საქართველოსა და აზერბაიჯანს შორის სტრატეგიულ პარტნიორობას და იმედი გამოთქვეს, რომ ორ ქვეყანას შორის ურთიერთობები სამომავლოდ კიდევ უფრო გაღრმავდება.
