პანკისში ჩატარებული სპეცოპერაციისას მოკლული თემრილან მაჩალიკაშვილის მამამ, მალხაზ მაჩალიკაშვილმა სუს-ში გამოკითხვაზე შესვლამდე ჟურნალისტებთან განაცხადა, რომ ის მეტჯერ აღარ აპირებს გამოკითხვაში მონაწილეობის მიღებას.
"როგორც ყველანი ხედავთ, მე დღეს მეოთხედ ვიმყოფები გამოკითხვაზე ჩემი მოსისხლე მტრების შენობაში. ჩემთვის აქ მოსვლა სიკვდილზე მეტია. აქედან გამომდინარე, მე აღარ ვაპირებ ამ ცირკში მონაწილეობის მიღებას და ჩემი თავის გამასხარავებას.
მე ვაცხადებ, რომ აღარ მოვალ დაკითხვაზე. იძულებით თუ მომიყვანენ, მომიყვანონ. მე ამასაც შევეწინააღმდეგები. თუ უნდათ ჩამსვან ციხეში და იქ დამკითხონ. მე აღარ შემიძლია აღარც ფიზიკურად და არც მორალურად. თუ უნდათ დამაკავონ, მე ეს მირჩევნია, ვიდრე ამ შენობაში ვიარო", - განაცხადა მაჩალიკაშვილმა.
ის დღეს, სუს-ში მეოთხედ დაიბარეს გამოკითხვაზე.
