ამ წუთებში, საქართველოს ეროვნულ უნივერსიტეტში მოსამართლეობის საკვალიფიკაციო გამოცდის მეორე ეტაპი მიმდინარეობს. გამოცდაში 92 პირი მონაწილეობს. საერთო სპეციალიზაციით -2, სისხლის სამართლის სპეციალიზაციით - 65 და სამოქალაქო და ადმინისტრაციული სამართლის სპეციალიზაციით 25 გამოსაცდელი.
წერითი გამოცდა 6 საათს გაგრძელდება.
გამოცდის ელექტრონული სისტემა უზრუნველყოფს თითოეული გამოსაცდელისათვის საგამოცდო ტესტის ინდივიდუალურად შედგენას.
გამოცდის ტესტი შეიცავს საკვალიფიკაციო გამოცდისათვის გათვალისწინებული სამართლის შესაბამისი დარგების მიხედვით შედგენილ 5 ღია პასუხიან დავალებას.
დავალების შესრულების დროს გამოსაცდელმა უნდა შეძლოს სამართლებრივი კვალიფიკაცია - სამართლებრივი ნორმების შეფარდება დავალებაში მოცემულ სიტუაციასთან, ასევე, დავალების ამგვარი გადაწყვეტის დასაბუთება, როგორც თეორიული, ისე პრაქტიკული არგუმენტებით.
ყოველი დავალება ფასდება ხუთქულიანი სისტემით. წერითი გამოცდა ჩაბარებულად ჩაითვლება, თუ გამოსაცდელი დააგროვებს სულ ცოტა 15 ქულას.
წერითი გამოცდა ტარდება გამოსაცდელის სურვილის შესაბამისად - ელექტრონული სისტემის საშუალებით ან წერილობითი ფორმით. გამოცდის წერილობითი ფორმით ჩაბარების მსურველ გამოსაცდელს გადაეცემა სპეციალური საგამოცდო რვეული.
შეგახსენებთ, რომ გამოცდის პირველი ეტაპის დასრულების შემდეგ გამოსაცდელებს, რომელთაც ტესტური დავალების შესრულების დროს სულ ცოტა 70 ქულა დააგროვეს, საშუალება ჰქონდათ მიემართათ მოსამართლეობის საკვალიფიკაციო გამოცდის საპრეტენზიო ჯგუფისთვის.
მოსამართლეთა საკვალიფიკაციო გამოცდის მეორე ეტაპს იუსტიციის უმაღლესი საბჭოს მდივანი და წევრები აკვირდებოდნენ.
როგორც იუსტიციის უმაღლესი საბჭოს მდივანი, გიორგი მიქაუტაძე აცხადებს, თითოეული გამოსაცდელი მაქსიმალურადაა დაცული და მათი შეფასებები, ობიქეტური იქნება.
"დღეს დაიწყო მოსამართლეთა საკვალიფიკაციო გამოცდის მეორე ეტაპი. ეს არის წერითი გამოცდა, სადაც გამოსაცდელს ექნება ხუთი ღია ტიპის კითხვა, თითოეული მათგანი შეფასდება ხუთი ქულით ანუ მაქსიმალური ქულათა რაოდენობა არის 25, ხოლო მინიმალური ზღვარი რაც უნდა გადალახოს გამოსაცდელმა არის 15 ქულა. იყო საპრეტენზიო განაცხადები შემოსული, რის შემდეგაც მცირედით გაიზარდა ტესტებში გადალახული ქულების რაოდენობა, შესაბამისად დღეს გამოცდაზე წარმოდგენილია 92 გამოსაცდელი. წერითი გამოცდა გულისხმობს არგუმენტირებულ დასაბუთებას როგორც სამართლებრივ, ასევე პრაქტიკული თვალსაზრისით, ანუ კაზუსის ტიპის კითხვები ექნებათ გამოსაცდელებს, რომელზეც უნდა დაწერონ არგუმენტირებული დასაბუთება, გაუკეთონ შესაბამისი შეფასება- კვალიფიკაცია. რაც შემდეგ გასწორდება კომისიის ორი წევრის მიერ დამოუკიდებლად და თუ მათ შორისაც არ იქნება თანხვედრა ქულებში, ასეთ შემთხვევაში ჩაერთვებიან კომისიის სხვა წევრები, თავმჯდომარე და ამგვარად მიიღება გადაწყვეტილება.
თითოეული გამოსაცდელი დაცულია მაქსიმალურად რომ ობიექტური იქნება მისი შეფასება. მინდა დიდი მადლობა გადავუხადო საქართველოს ეროვნულ უნივერსიტეტს იმისთვის, რომ დაგვითმეს შენობა და სრული ტექნიკური მხარდაჭერა გამოუცხადეს მოსამართლეთა საკვალიფიკაციო გამოცდებს", - აცხადებს მიქაუტაძე.
