“ჩვენ გადავდგამთ იმ ნაბიჯებს, რომელიც ჩვენი მხრიდან არის გასაკეთებელი და მთავრობამ უნდა გადადგას ის ნაბიჯები, რომელიც მისი მხრიდან არის გასაკეთებელი, მაგრამ ეს უნდა იყოს კოორდინირებული,” – ეს განცხადება “ეროვნული ბანკის“ პრეზიდენტმა, კობა გვენეტაძემ, დღეს პარლამენტში საფინანსო-საბიუჯეტო კომიტეტის სხდომის შემდეგ ჟურნალისტებთან ოპოზიციის კრიტიკის საპასუხოდ გააკეთა. კომიტეტის სხდომაზე ენმ-ის წარმომადგენელმა, რომან გოცირიძემ, მას ჰკითხა, რა პასუხი აქვს ფინანსთა მინისტრის, მისი თქმით, პოპულისტური განცხადებებზე, როდესაც ის ცალსახად „ეროვნული ბანკის“ კომპეტენციაში იჭრება და ხშირ შემთხვევაში აზიანებს ქვეყნის იმიჯს. სხდომის დასრულების შემდეგ კი მან ჟურნალისტებთან დასმულ კითხვებზე ისაუბრა და „ეროვნული ბანკის“ და მთავრობის კომპეტენციებს გაუსვა ხაზი.
"ვფიქრობ, საკმაოდ საინტერესო ანგარიში იყო და ბევრ ანალიზს და ინფორმაციას შეიცავდა. კითხვები ძირითადად ინფლაციასთან დაკავშირებით იყო. როგორც მოგეხსენებათ, ინფლაცია 2017 წელს ერთჯერადი ფაქტორების გამო მიზნობრივ მაჩვენებელზე უფრო მაღალი იყო და „ეროვნულმა ბანკმა“ იმ რეჟიმის შესაბამისად, რომელიც დღეს საქართველოში გვაქვს, მიიღო ზომები. კითხვები იყო ჭარბვალიანობასთან დაკავშირებით, თუ რატომ მივიღეთ ის ზომები, რაც მივიღეთ. ჯერ კიდევ 2017 წელს იყო მიღებული ზომები და ამაზე კომუნიკაცია გვქონდა. ეს არის მნიშვნელოვანი ფინანსური სტაბილურობისთვის და ეს არის ევროდირექტოვებთან მისადაგებისთვის აუცილებელი ნაბიჯები. ამავე დროს, ზოგადად, როცა ვსაუბრობთ ფინანსურ სტაბილურობაზე, ფინანსურ პოლიტიკაზე, ეს არ არის მხოლოდ „ეროვნული ბანკის“ საქმე და პრეროგატივა. ჩვენ გადავდგამთ იმ ნაბიჯებს, რომელიც ჩვენი მხრიდან არის გასაკეთებელი და მთავრობამ უნდა გადადგას ის ნაბიჯები, რომელიც მისი მხრიდან არის გასაკეთებელი, მაგრამ ეს უნდა იყოს კოორდინირებული," - განაცხადა გვენეტაძემ.
