„ჩემთვის და მთელი მთავრობისთვის ფაშისტური ჯგუფების არსებობა ქვეყანაში მიუღებელია,“ - ამის შესახებ განცხადება ვიცე-პრემიერმა, საგარეო საქმეთა მინისტრმა, მიხეილ ჯანელიძემ, პარლამენტში ოპოზიციის კრიტიკის საპასუხოდ განაცხადა.
ევროინტეგრაციის და საგარეო საქმეთა კომიტეტების გაერთიანებულ სხდომაზე, სადაც ევროკავშირთან ინტეგრაციის საგზაო რუკის კონცეფციის პრეზენტაცია მიმდინარეობს, ოპოზიციამ საგარეო საქმეთა მინისტრისგან მოითხოვა პასუხი, თუ ის, რაც ბოლო დღეებში მოხდა, აზიანებს თუ არა საქართველოს ინტერესებს ევროინტეგრაციის გზაზე და ხელისუფლება უჭერს თუ არა მხარს ფაშისტურ ჯგუფებს. ამის საპასუხოდ ჯანელიძემ განაცხადა, რომ მთავრობა ყოველთვის შეებრძოლება ამ ჯგუფების არსებობას საქართველოში.
“ჩემთვის მიუღებელია ფაშისტური ჯგუფების არსებობა ქვეყანაში და რა თქმა უნდა მთავრობისთვის ყოველთვის მიუღებელი იქნება ასევე მათი არსებობა. მთავრობა ყოველთვის შეებრძოლება ამ ჯგუფების არსებობას საქართველოში. რაც შეეხება რადიკალურ ჯგუფებს, ამასაც სჭირდება პროცესის მართვა და რა თქმა უნდა, სახელმწიფო გადადგამს ყველა იმ ნაბიჯს, რომ აცილებული იქნას თავიდან რადიკალიზაცია, რადიკალურ ჯგუფებს შორის დაპირისპირება და რა თქმა უნდა, პირველ რიგში რუსეთის ინტერესების გატარება საქართველოში,“ - განაცხადა ჯანელიძემ.