„რეპში მოსმენილი სიტყვები და მიდგომები სახელმწიფო პოლიტიკის აქცენტებს საერთოდ არ უკავშირდება,“ - ეს განცხადება პარლამენტის ვიცე-სპიკერმა, გია ვოლსკიმ, მარიხუანას შესაძლო ლეგალიზებასთან დაკავშირებით განაცხადა.
გია ვოლსკი აცხადებს, რომ მისთვის მიუღებელია მარიხუანას წარმოებისა და გავრცელების დაშვება. ის საკონსტიტუციო სასამართლოსაც აკრიტიკებს და ამბობს, რომ არასწორი იყო მარიხუანას თაობაზე საკონსტიტუციო სასამართლოს მიერ მიღებული გადაწყვეტილება, მის მიერ დაშვებული რაოდენობა, რაც პრაქტიკულად ლეგალიზაციას ძალიან უახლოვდება.
“არა მგონია, რომ ნარკოტიკების მომხმარებელი უნდა ისჯებოდეს, მაგრამ დარწმუნებული ვარ, რომ ადამიანი, რომელიც ორიენტირებულია ნარკოტიკებით შემოსავლის მიღებაზე, იქნება ეს მცირე თუ დიდი დოზა, უნდა ისჯებოდეს, თან ძალიან მკაცრად. იმ პროექტში, რომელიც პარლამენტშია წარმოდგენილი, ჩვენ უნდა გადავხედოთ დოზებთან დაკავშირებულ საკითხებს. ეს ის თემაა, რაზეც ძირითადი კამათი მიმდინარეობს ექსპერტთა ჯგუფებს შორის. შეთანხმებულია პრინციპი, რომ ნარკომომხმარებელთა რაოდენობა შემცირდეს, ვებრძოლოთ ნარკოტიკების რეალიზატორებსა და გამავრცელებლებს და მოხდეს ცხოვრების ჯანსაღი წესის პროპაგანდა,“ - აღნიშნა გია ვოლსკიმ.
