როდესაც ეკონომიკური მდგომარეობა გაუმჯობესდება, მე ვიქნები პირველი, ვინც დააყენებს საკითხს, რომ ხელფასების მომატება უნდა მოხდეს, – ამის შესახებ თბილისის მერმა კახა კალაძემ მემანქანეების მიერ ხელფასების გაზრდის მოთხოვნასთან დაკავშირებთ განაცხადა.
მისი თქმით, არსებობს რიგი მიმართულებები, სადაც ორჯერ და სამჯერ ნაკლებ ხელფასებს იღებენ ადამიანები, მაგრამ საქმეს სიყვარულით და პასუხისმგებლობით ეპყრობიან.
“კიდევ ერთხელ ვიმეორებ, რომ მე ჩემს თანამშრომლებს რაღაც ჯგუფებად არ ვყოფ და პრიორიტეტებს არ ვანიჭებ. ჩემთვის ყველას საქმიანობა არის მნიშვნელოვანი და ყველას აქვს უდიდესი პასუხისმგებლობა პირველ რიგში დედაქალაქის მოსახლეობის მიმართ. როდესაც ეკონომიკური მდგომარეობა გაუმჯობესდება, პირველი ვიქნები მე, ვინც დააყენებს საკითხს, რომ ხელფასების მომატება უნდა მოხდეს, არა მხოლოდ მეტროს მემანქანეებისთვის, არამედ ჩვენ გვაქვს რიგი მიმართულებები, სადაც ორჯერ და სამჯერ ნაკლებ ხელფასებს იღებენ ადამიანები, უდიდესი პასუხისმგებლობა აკისრიათ, მაგრამ საქმეს სიყვარულით და პასუხისმგებლობით ეპყრობიან. მათ იციან, რომ როგორც კი საშუალება გაჩნდება, ჩვენ მაშინვე მივიღებთ გადაწყვეტილებას, რომ ეს პრობლემები მოგვარდეს, მათ შორის მემანქანეებისაც“, – განაცხადა კალაძემ.