ეს ადამიანი [გიორგი მარგველაშვილი] ვერც ერთ დარგში ვერ ერკვევა, - ამის შესახებ პარლამენტის ვიცე-სპიკერმა გია ვოლსკიმ განაცხადა.
მისი თქმით, დარგი არ არსებობს, სადაც ის სპეციალისტად ჩამოყალიბდა. მისივე თქმით, მარგველაშვილის გამოსვლები პოპულისტურია და იმდენად ზედაპირული, რომ სახელმწიფოს მეთაურს ნამდვილად არ ამშვენებს.
„ერთი ადამიანი იმაზე გაცილებით მეტს არ უნდა ხარჯავდეს, ვიდრე პარლამენტის მთელი შემადგენლობა. საერთაშორისო მოგზაურობები არა თუ შეუთანხმებელია სახელმწიფო სტრუქტურებთან, არამედ აბსოლუტურად უაზროა და მისთვის დამახასიათებელი ზედაპიროულობით ხორციელდება. საქართველოში სოციალური პრობლემები და უმუშევრობა არსებობს, რასთან დაკავშირებითაც მისი გამოსვლა შეფასებაზე უნდა აგებულიყო. კერძოდ, თუ რა კეთდება და ძალიან ბევრი რამ კეთდება, რომ ვითარება გაუმჯობესდეს. ამ მხრივ, სტატისტიკა ჩვენს მხარესაა, მაგრამ კიდევ თუ რაიმე მოსაზრება არსებობს, შეფასებების საფუძველზე უნდა ილაპარაკოს. ეს ადამიანი ვერც ერთ დარგში ვერ ერკვევა. გონია, რომ განათლების სისტემაში მის შემდეგ არაფერი გაკეთებულა, როცა აღმოჩნდა, რომ ბევრი რამ გაკეთდა და იგეგმება. დარგი არ არსებობს, სადაც ის სპეციალისტად ჩამოყალიბდა. მისი გამოსვლები პოპულისტურია და იმდენად ზედაპირული, რომ სახელმწიფოს მეთაურს ნამდვილად არ ამშვენებს. ინტელექტის დეფიციტს ნამდვილად არ უჩივის, მაგრამ ეს არ ნიშნავს, რომ სახელმწიფოს მეთაურს მხოლოდ ეს ეყოფა. ინტელექტი გარკვეული ცოდნაა, მაგრამ მთლად გამოჩენილი აქაც არაა. ნაკითხობა არ არის საკმარისი, რათა ანალიზი გააკეთო პრობლემების, ხედვების და დისკუსია შემოგვთავაზო“, – განაცხადა გია ვოლსკიმ.
