5 წლის განმავლობაში მარგველაშვილს შეეძლო მეტი გამბედაობა გამოეჩინა სასამართლო სისტემაში არსებულ პრობლემებზე, მოსმენების კანონზე, კრიმინალურ ვითარებასა და კორუფციაზე, - ამის შესახებ "ევროპული საქართველოს" წევრმა ელენე ხოშტარიამ პარლამენტში პრეზიდენტის გამოსვლის შეფასებისას განაცხადა.
მისი თქმით, პრეზიდენტის მხრიდან ამ საკითხებზე უფრო მეტი გამბედაობა უნდა ყოფილიყო.
"პირველ რიგში, ეს იყო "ქართული ოცნების" შეფასება, რაც ძალიან მნიშვნელოვანია. პირდაპირ ვაღიაროთ, რომ ყველა იმ საკითხზე, რაზეც "ქართულ ოცნებაში" იყო ძალიან დიდი მოლოდინი, რატომაც მათ მიიღეს მანდატი, ეს არის დემოკრატიული განვითარება, სასამართლო სისტემა, მედია ვითარება, ეს არის პოლიტიკური პროცესი. ყველა მიმართულებით გიორგი მარგველაშვილმა ძალიან მკაფიოდ, სამართლიანად ისაუბრა და თქვა, რომ სერიოზული ჩავარდნა აქვს ხელისუფლებას. როგორ მიზანმიმართულად ებრძოდა "ქართული ოცნება" პოლიტიკურ პარტიებს, როგორ დაზიანდა დემოკრატია, როგორი პრობლემებია მედია გარემოში ანუ ამ შემთხვევაში, რისთვისაც მანდატი მიიღო ქართულმა ოცნებამ. მეორე ნაწილი, რაც სამწუხაროდ პრეზიდენტს არ უსაუბრია, ეს არის კრიმინოგენური ვითარება და განცდა იმისა, რომ დაუცველია ყველა. გვესმის დაპირისპირება ქუჩებში ახალგაზრდებს შორის, მკვლელობები, ძალადობა ოჯახებში ასევე სოფლებში, სადაც დადიხარ და საქონელს პარავენ ხალხს. არც კორუფციაზე არ უსაუბრია პრეზიდენტს და რაც მთავარია არ უსაუბრია ტოტალურ გაჭირვებაზე და იმ უიმედობაზე, რაც არის დღეს ქვეყანაში. დღეს ჩვენ გვიყურებენ ადამიანები, რომლებსაც პასუხი უნდათ მხოლოდ ამაზე და ჩვენ რა თქმა უნდა "ქართულ ოცნებასთან" დავაყენებთ ყველა ამ საკითხს, როდესაც ესეთი ვითარებაა ქვეყანაში არ გამოსწორდა ის, რასაც ხალხი ელოდა და პირიქით გაუარესება არის სოციალურ-ეკონომიკური. ამაზე ვინმემ პასუხისმგებლობა უნდა აიღოს.
ძალიან მნიშვნელოვანია, რომ კარგად გვესმოდეს მთავარი პასუხისმგებელი ამ ვითარებაზე, იმ ფუნქციებიდან გამომდინარე, რაც პრეზიდენტს დღეს გააჩნია და ასევე იმ მიზანმიმართული ბრძოლიდან, რაც პრეზიდენტის მიმართ იყო არაერთხელ გაგვიკრიტიკებია, რომ იმ ხუთი წლის განმავლობაში მეტი გამბედაობა შეეძლო გამოეჩინა. სასამართლო სისტემაში მიმდინარე პრობლემებზე, მოსმენების კანონზე და სხვადასხვა ბევრ საკითხებზე უფრო გამბედავი უნდა ყოფილიყო. ჩვენ დავსვამთ კითვებს რა უშველის იმ ახალგაზრდების უპერსპექტივობის გრძნობას, რა უშველის უმუშევრობას, კრიმინალურ ვითარებას, კორუფციას და ა.შ. აი ამაზე უნდა გვიპასუხონ თუ როგორ გამოსწორდება ეს ყველაფერი",- განაცხადა ელენე ხოშტარიამ.
