„აღნიშნულ გადაწყვეტილებას პირადად მე გავასაჩივრებ. მიმაჩნია, რომ ეს განაჩენი მეტისმეტად უსაფუძვლო და დაუსაბუთებელია“, - განუცხადა „ჯი-ეიჩ-ენს“ ზურაბ ნეფარიძის ადვოკატმა, ედიშერ ქარჩავამ.
ნეფარიძეს თბილისის საქალაქო სასამართლომ გამოძალვით ქრთამის აღების, სამსახურებრივი მდგომარეობის გამოყენებით თაღლითურად დიდი ოდენობით თანხის დაუფლებისა და შრომის კანონმდებლობის დარღვევის ფაქტებზე 11 წლით თავისუფლების აღკვეთა მიუსაჯა.
როგორც ქარჩავა აცხადებს, აღნიშნული გადაწყვეტილება სასამართლომ ზეწოლის შედეგად მიიღო.
„დღევანდელ გადაწყვეტილებას ველოდი, რადგან შთაბეჭდილება დამრჩა, რომ სასამართლოზე გარკვეულწილად, ძალიან დიდი ზეწოლა იყო, რომ ეს განაჩენი დამდგარიყო. კონკრეტულად თუ ვისგან, გამოჩნდება. ფაქტია, რომ ზურაბ ნეფარიძე პროკურორს ამხელდა მისი პირადი ცოხვრების კადრების გასაჯაროვების დაშანტაჟებაში. აღნიშნულ საქმეს გენინსპეცქია იძიებს. იმისთვის, რომ პროკურორის დადანაშაულება არ მომხდარიყო, გარკვეულწილად, ამ განაჩენის დადგომას არსებითი მნიშვნელობა ჰქონდა პროკურორისთვის“, - დასძენს ქარჩავა.
ნეფარიძე ბრალს არ აღიარებს და აცხადებს, რომ თანხებს თანამშრომლები ნებაყოფლობით დებდნენ.
„ბრალს არ აღიარებს, ფაქტობრივ გარემოებებს ადასტურებს, მაგრამ ასაბუთებს, რომ ეს ქრთამის შემადგენლობა არ იყო. ის ამბობს, რომ თანამშრომლები თანხებს ნებაყოფლობით დებდნენ კომუნალური გადასახადების და ბიუროს ღონისძიებების დასაფინანსებლად. 5 000 ლარი, რომელიც ბიუროსთვის იყო გამოყოფილი, მისი სხვა მიზნით გამოყენება, გარდა ხელფასებისა, არ არსებობდა. აღნიშნული საკითხი სიტყვიერ დონეზე საკრებულოს ხელმძღვანელობასთანაც კი შეთანხმებული იყო“, - აცხადებს ადვოკატი.
ცნობისთვის, ზურაბ ნეფარიძე გასული წლის 26 აგვისტოს დააკავეს. სასამართლოს მიერ გავრცელებული ინფორმაციის მიხედვით, ყოფილი დეპუტატი 2014 წლის 15 აგვისტოდან 2017 წლის 31 მარტის ჩათვლით თაღლითურად დაეუფლა საკრებულოს კუთვნილ, დიდი ოდენობით 36 552,5 ლარს.