უნდა არსებობდეს წესები, რომ ადამიანებმა ერთმანეთს შეურაცხყოფა არ მიაყენონ, - ამის შესახებ "ქართული ოცნების" წევრმა სოფო კილაძემ განაცხადა.
მისი თქმით, საერთო წესებზე შეთანხმების მიზნით, „ქართული ოცნება“ შიდა პარტიულ დოკუმენტს მიიღებს.
„ცხადია, ყველას აქვს შესაძლებლობა გამოხატოს საკუთარი აზრი გუნდის შიგნით, თუ გუნდის გარეთ. საუბარი არის კონკრეტულ წესებზე, რომელზეც ნებაყოფლობით ყველანი ერთად შევთანხმდებით. აქ მხოლოდ ნებაყოფლობითობაზეა საუბარი. ნებისმიერ განვითარებულ ქვეყანაში არსებობს თამაშის წესები პოლიტიკური პარტიის შიგნით. ამ წესებს სცემენ პატივს და ეს არ ითვლება დემოკრატიის შეზღუდვად. არსებობს ელემენტარული წესები, რომელსაც ყველამ პატივი უნდა სცეს. საუბარია პარტიის შიდა დოკუმენტზე, რომელიც იქნება ყველას შეთანხმების საგანი ნებაყოფლობითობის საფუძველზე. უნდა არსებობდეს წესები, რომ ადამიანებმა ერთმანეთს შეურაცხყოფა არ მიაყენონ – ეს არის ელემენტარული ჭეშმარიტება“, – განაცხადა კილაძემ.