„მოწმის ჩვენებით, მეკო დაახლოებით, 90-100 კმ/სთ სიჩქარით მოძრაობდა, რადგან სიჩქარე ავტოპილოტზე ჰქონდათ დაყენებული. ვიმეორებ, ისინი დასაშვები სიჩქარით მოძრაობდნენ“, - აცხადებს „ჯი-ეიჩ-ენთან“ მორაგბე მერაბ კვირიკაშვილის, იგივე მეკოს ადვოკატი, ნუკრი კვინიკაძე.
რამდენიმე თვეა, ქუთაისის საქალაქო სასამართლოში კვირიკაშვილის სასამართლო პროცესები მიმდინარეობს. 30 აპრილს, 16:00 საათზე კვლავ ბრალდების იმ მოწმეების დაკითხვით გაანხლდება პროცესი, რომლებიც შემთხვევის ადგილზე იმყოფებოდნენ.
„წინა პროცესზე დაზარალებულები დაიკითხნენ, მათ თავიანთი პოზიციები დააფიქსირეს. გარდაცვლილი პაპასკირის მამა დაიკითხა, ის დაზარალებულის უფლებამონაცვლედაა ცნობილი. ის შემთხვევის თვითმხილველი მოწმე არ გახლვთ. დაიკითხა ასევე, გიორგი ლომინაძე, რომელიც მეკოს მანქანაში იმყოფებოდა. მისი ჩვენებით, მეკო დაახლოებით, 90-100 კმ/სთ სიჩქარით მოძრაობდა, რადგან სიჩქარე ავტოპილოტზე ჰქონდათ დაყენებული. ვიმეორებ, ისინი დასაშვები სიჩქარით მოძრაობდნენ.
როგორც ლომინაძე ჰყვება, ავტომანქანაში ტელეფონით იყო გართული, რა დროსაც, მეკოს ხმა გაიგონა - რას შვებაო?! ამ დროს მანქანა მარცხნიდან მარჯვნივ მკვეთრად წავიდა, მერე მოცურდა და შეჯახება მოხდა, რის შედეგადაც, მან გონება დაკარგა, გონზე უკვე საავადმყოფოში, რამდენიმე დღის შემდეგ მოვიდა“, -აცხადებს ადვოკოატი.
როგორც ის განმარტავს, მეკო სასამართლოში ჩვენებას მას შემდეგ მისცემს, რაც ბრალდების მხარე თავისი მოწმეების დაკითხვას დაასრულებს.
„ბრალდების მხარეს 10-მდე მოწმის დაკითხვა დარჩა, როცა მათი დაკითხვა დასრულდება, მეკოც ჩვენებას მისცემს. ის დაცვის მხარის მოწმეთა სიაში მყავს შეყვანილი და როგორც დაცვის მხარის მოწმე, ისე დაიკთხება“, - დასძენს კვინიკაძე.
შეგახსენებთ, რომ გასული წლის 21 ივლისს, სამტრედია-ქუთაისის შემოვლით გზაზე ავტოსაგზაო შემთხვევა მოხდა. ერთმანეთს, „იქს 5“ და „ჰონდას“ მარკის ავტომანქანები შეეჯახნენ. ავარიის შედეგად, დაიღუპა მორაგბე მეკო კვირიკაშვილის მეუღლე, ანანო ბუაძე, „ჰონდას“ მგზავრები, გიორგი პაპასკირი, ნუცა კალანდია და ანი ჩხაიძე. მძიმედ დაშავდნენ, თავად მეკო კვირიკაშვილი, ასევე მორაგბე გიორგი ლომინაძე და ნუცა გუნცაძე.
გამამტყუნებელი განაჩენის შემთხვევაში, მეკო კვირიკაშვილს სასჯელის სახით 6-დან 10 წლამდე თავისუფლების აღკვეთა ემუქრება.
