ეს არ იქნება დიეტის მსგავსი შიმშილობა, არამედ ეს იქნება სასიკვდილო შიმშილობა, როგორც 1981 წელს ირლანდიაში, - ამის შესახებ „ქართული მარშის“ ლიდერმა სანდრო ბრეგაძემ განაცხადა.
ბრეგაძის განცხადებით, ისინი იშიმშილებენ კანცელარიასთან, შს სამინისტროსთან და პროკურატურასთან.
„შვიდმა პოლიტიკურმა პატიმარმა გამოგვიგზავნა წერილი, სადაც წერია, რომ 30 აპრილს, გლდანის მე-8 სასჯელაღსრულების დაწესებულებაში დაიწყებენ შიმშილს. შიმშილობას შეუერთდებიან ციხის გარეთაც. ეს არ იქნება დიეტის მსგავსი შიმშილობა, არამედ ეს იქნება სასიკვდილო შიმშილობა, როგორც 1981 წელს ირლანდიაში. შიმშილობა დაიწყება სახელმწიფო კანცელარიასთან, ასევე დაკავებულთა დედები იშიმშილებენ შს სამინისტროსთან და შიმშილობა იქნება ასევე მთავარ პროკურატურასთან. მოვითხოვთ, გათავისუფლდნენ პოლიტპატიმრები და დაისაჯონ ის პირები, ვინც ახორციელებენ პოლიტიკურ ტერორს და შერჩევით სამართალს. თუ ომი უნდათ, ომს მიიღებენ“, - განაცხადა სანდრო ბრეგაძემ, რომელიც საპარლამენტო უმრავლესობის წევრებს - ვანო ზარდიაშვილს, თამარ ჩუგოშვილს, მამუკა მდინარაძეს და „ევროპული საქართველოს“ ლიდერს გიგა ბოკერიას „ქართული მარშის“ განადგურების მცდელობასა და სასამართლოზე ზეწოლაში ადანაშაულებს.