ჩემი შეფასებით, ის მტკიცებულებები, რომელიც წარმოდგენილია საქმეში, არ ქმნის დასაბუთებული ეჭვის საფუძველს, რომ რუსლან ალდამოვის მიერაა ჩადენილი ეს დანაშაული, - ამის შესახებ ტერორიზმის მხარდაჭერის საქმეზე ბრალდებული რუსლან ალდამოვის ადვოკატმა მარიამ კუბლაშვილმა ჟურნალისტებს განუცხადა.
მისი განცხადებით, საქმეში არ დევს არცერთი მტკიცებულება, რომლითაც მისი დაცვის ქვეშ მყოფის ან სხვა ბრალდებულების მხრიდან დანაშაულის ჩადენა მტკიცდება.
"დაცვის მხარე არაა ვალდებული ამტკიცოს პირის უდანაშაულობა. ბრალდების მხარეა ვალდებული დაუმტკიცოს ჩემი დაცვის ქვეშ მყოფს ის რომ იგი ნამდვილად დამნაშავეა. შესაბამისად ჩემი შეფასებით ის მტკიცებულებები, რომელიც წარმოდგენილია საქმეში არ ქმნის დასაბუთებული ეჭვის საფუძველს, რომ რუსლან ალდამოვის მიერ ჩადენილია ეს დანაშაული. ტერორიზმის დახმარებისთვის ან რესურსებით უზრუნველყოფის ბრალდებისთვის აუცილებელია არსებობდეს ტერორისტული მიზანი. საინტერესოა რა სამართლებრივი საფუძვლით და გარემოებებით მოხდება ამის დამტკიცება. მზად ვარ შესავალი სიტყვისთვის და ვეცდები შესავალი სიტყვით სასამართლოს შევუქმნა შთაბეჭდილება ამ საქმეზე. აქცენტს გავაკეთებ ყველა მნიშვნელოვან დეტალზე და მაქვს მოლოდინი გამამართლებელი განაჩენის", - განაცხადა მარიამ კუბლაშვილმა.
ადვოკატის თქმით, საქმეში არსებული მტკიცებულებები არაფრისმთქმელია და ახმედ ჩატაევის შესახებ ზოგად ინფორმაციას ეხება, რაც არცერთ ბრალდებულთან არაა შემხებლობაში.
მარიამ კუბლაშვილი ასევე ყურადღებას ამახვილებს იმ ფაქტზე, რომ ჩატაევის დაჯგუფების წევრები, რომლებთანაც კავშირშიც გამოძიება ბრალდებულებს ადანაშაულებს, საქართველოში ორი წლის განმავლობაში იმყოფებოდნენ და თავისუფლად გადაადგილდებოდნენ.
ცნობისთვის, სუს-ის მიერ ჩატარებული სპეცოპერაციის შედეგად დაკავებული 6 პირიდან, 4- ს ბრალი ტერორისტებისთვის ხელშეწყობაში, ხოლო 2 პირს, ტერორისტული ორგანიზაციის წევრობაში ედება ბრაკი, ერთ- ერთს ასევე ბრალი ედება საქართველოში ტერორისტული მიზნით შემოსვლაში.